Олий суд 16 феврал воқеалари бўйича собиқ божхоначилар ишини кўришни бошлади

30 сентябр куни Олий суд жиноят ишлари бўйича судлов ҳайъати ишни кассация тартибида кўришни бошлади. Бу ҳақда Kun.uz мухбири хабар бермоқда.

Суд мажлисида иштирок этган прокурор ўз нутқида Тошкент вилоят прокурорининг протестини қўллаб-қувватлашини билдириб, собиқ божхоначиларга нисбатан чиқарилган оқлов ажримини бекор қилишни ҳамда ишни апелляцияда қайта кўришга жўнатишни сўради.

Судланувчиларнинг ҳимоячиси суд мажлисида сўзга чиқиб, ҳимояси остидаги шахсларнинг айбсиз эканини, прокурор протестида келтирилган важлар собиқ божхоначиларни айбдор деб топиш учун асос бўлолмаслигини қайд этди.

Судланувчилар ҳам сўзга чиқиб, ўзларининг айбсиз эканини, Тошкент вилоят судининг апелляция ҳайъати томонидан 2021 йил 24 июл куни чиқарилган оқлов ажримини ўз кучида қолдиришни ҳамда протестни қаноатлантиришдан рад этишни сўради.

Суд ҳайъати танаффус эълон қилиб, иш бўйича кейинги суд мажлиси 2021 йил 7 октябр куни ўтказилишини маълум қилди.

Kun.uz суд жараёнларини ёритишда давом этади.