Чилонзор туманидаги кўп қаватли уйлардан бирида газ портлади

Жорий йилнинг 3 октябрь куни соат 22:13ларда Тошкент шаҳрининг Чилонзор тумани 7-кварталида жойлашган 59-уйда, бирламчи маълумотга кўра, газ-ҳаво аралашмасининг чақнаши содир бўлган.

Фавқулодда вазиятлар вазирлиги хабарига кўра, воқеа етти қаватли уйнинг 36-квартирасида содир бўлган. Фавқулодда вазият оқибатларини бартараф этиш учун Фавқулодда вазиятлар вазирлигининг 5та ёнғин-қутқарув экипажи воқеа жойига етиб борган.

Мавжуд маълумотларга кўра, уй аҳолиси жабрланмаган. Қурбонлар йўқ. Вазият оқибатида бир нечта квартираларга қисман зарар етган, дераза ва эшиклар шикастланган.

Қайд этилишича, айни вақтда ушбу фавқулодда вазиятнинг сабаблари ўрганилмоқда. 17 нафар уйи шикастланган фуқаролар вақтинчалик меҳмонхонага жойлаштирилган.