2021 йилда эксплуатация муддатини ўтаб бўлган 544та кўп квартирали уй-жой реновация қилинади

2021 йилда эксплуатация муддатини ўтаб бўлган 544 та кўп квартирали уй-жой реновация қилинади. Бу ҳақда АОКАда Уй-жой коммунал хизмат кўрсатиш вазирлиги мутасаддилари иштирокида бўлиб ўтган матбуот анжуманида айтиб ўтилди.

Фото: Kun.uz

Қайд этилишича, 544 та кўп квартирали уй-жойдан 211 та уй-жой бузиб қайтадан қурилади, 57 та уйда реновация ишлари амалга оширилади, 276 та уй инструментал ўрганилади.

Билдирилишича, 2021 йилнинг 1 октябридан бошлаб қурилиши тугалланган ва фойдаланишга қабул қилинган кўп квартирали уй-жойни бошқариш биринчи икки йилда қурувчи томонидан амалга оширилади ҳамда мазкур муддатга кўп квартирали уй-жой эксплуатациясининг кафолат муддати жорий қилинади.

2021 йилда кўп квартирали уй-жойларни мукаммал ва жорий таъмирлаш чора-тадбирларини амалга ошириш учун Молия вазирлиги томонидан Махсус фондга 100 млрд сўм ажратилган.

Мулкдорлар ёки бошқарувчиларга кўп квартирали уй-жойларга туташ ер участкалари чегаралари ва ўлчамларини белгилаш ҳамда уларга доимий фойдаланиш ҳуқуқини белгиловчи зарур ҳужжатларни, шу жумладан кадастр ҳужжатларини расмийлаштириш учун тўловларни бир йил давомида тенг улушларда бўлиб-бўлиб тўлашга рухсат берилади.

Бундан ташқари, электрон реестр ва баҳолаш дастурий платформаси орқали бошқарув ташкилотлари рейтингида тўртта A, B, C, D тоифаларга кўра уй-жой мулкдорларининг овозига асосан баҳолаш тизими йўлга қўйилди.