ФВВ Қамчиқ довонида ҳаракатланувчи ҳайдовчиларни яхвонлик юзага келишидан огоҳлантирди

Фото: Фавқулодда вазиятлар вазирлиги

Қамчиқ довонида 9-10 октябрь кунлари ёғингарчилик (ёмғир-қор) бўлиши кутилаётгани сабабли Фавқулодда вазиятлар вазирлиги ҳайдовчиларга огоҳлантириш билан чиқди.

Вазирликнинг қайд этишича, А-373 Тошкент—Ўш автомобиль йўлининг Қамчиқ довони ҳудудида вақти-вақти билан кучли ёғингарчилик, туман, кўринувчанлик 50 метргача пасайиши, шамол тезлиги 15—20 метр/секундгача кучайиши кутилмоқда. Автойўлда яхвонлик юзага келиши мумкин.

Шу муносабат билан вазирлик довон йўлида ҳаракатланаётган вақтда ҳайдовчиларни барча хавфсизлик чораларини кўришга чақирди.

Фавқулодда вазиятлар вазирлиги 6 октябрь куни ҳам кузатиладиган об-ҳаво шароити туфайли Қамчиқ довонида ҳаракатланувчи ҳайдовчиларни хавфсизлик чораларини кўришга чақирганди.