“Толибон” делегацияси Қатарда АҚШ дипломатлари билан учрашув ўтказди

“Толибон” ҳаракати Доҳа шаҳрида америкалик дипломатлар билан учрашув ўтказди. Бу ҳақда Қатарнинг Al Jazeera телеканали хабар берди.

“Афғонистон ислом амирлиги” делегацияси Қатар пойтахтида америкалик ҳамкасблари билан учрашди. Мулоқотлар эртага ҳам давом эттирилади”, – дея Афғонистон ташқи ишлар вазири вазифасини бажарувчи мавлавий Амир Хон Муттақийнинг сўзларидан иқтибос келтиради телеканал.

Толиблар вакилининг таъкидлашича, ҳаракат “Америка томонига Кобул ва Вашингтон ўртасидаги муносабатларда янги саҳифа очишни таклиф этган”, шу билан бирга, америкаликларни “Афғонистоннинг суверенитетини ҳурмат қилиш ва унинг ички ишларига аралашмасликка” чақирган.

Маълумот берилишича, толиблар яқин кунларда Европа Иттифоқи делегацияси билан ҳам учрашув ўтказади.

7 октябр куни Ўзбекистон ташқи ишлар вазири Абдулазиз Комилов бошчилигидаги делегация мавлавий Амир Хон Муттақий билан учрашув ўтказгани хабар қилинганди.