Ўзбекистонда коррупцияга қарши курашишни сунъий интеллект ёрдамида такомиллаштириш учун словениялик олимлар жалб этилади

Коррупцияга қарши курашиш агентлиги вакилларининг Словенияга ташрифи давомида сунъий интеллектдан коррупцияга қарши курашиш, жамоатчилик назоратининг таъсирчан механизмларини йўлга қўйишда амалий ҳамкорлик масаласи муҳокама этилган.

Фото: Коррупцияга қарши курашиш агентлиги

Агентлик матбуот хизматининг маълум қилишича, Йожеф Штефани номидаги институт вакиллари Ўзбекистонда давлат харидлари ва ҳукумат очиқ маълумотларини қамраб оладиган ҳамда мавжуд порталларни интеграциялаш ва модернизация қилишда институт олимлари билан яқиндан ҳамкорлик қилиш, мамлакатимиздаги тизимларни сунъий интеллект ёрдамида фойдаланувчиларга қулай ҳамда мукаммал қилиш бўйича келишувларга эришилди. Мазкур ҳамкорлик дастурларининг амалиётга татбиқ этилиши орқали давлат харидлари ва бошқа очиқ маълумотлардан фуқаролар ва жамоатчилик вакилларининг фойдаланишини осонлаштириш, аҳолининг коррупцияга қарши курашишдаги фаоллигини ошириш, жамоатчилик назорати учун янги имкониятларни яратишга эришилиши таъкидланмоқда.

Маълумот учун, Словениядаги Йожеф Штефани номидаги институт Европанинг сунъий интеллект соҳасидаги етакчи илмий-тадқиқот марказларидан бўлиб, бу ерда 1100дан ортиқ олимлар изланиш олиб боради. Институт Microsoft, Bloomberg сингари дунёнинг илғор компанияларига ўз маҳсулотларини етказиб беради. Хусусан, институт олимлари томонидан яратилган сунъий интеллект алгоритми ёрдамида бугун Словенияда муваффақиятли фаолият юритаётган, коррупциявий омилларнинг олдини олишга қаратилган ERAR порталининг асоси яратилган.