АҚШ компанияси 100 мингта Tesla электромобили сотиб олади

АҚШнинг автомобилларни ижарага берувчи Hertz компанияси Tesla билан 100 мингта электромобил сотиб олиш ҳақида келишувга эришди. Бу Tesla тарихидаги энг йирик буюртма бўлиб, келишувнинг молиявий томонлари ошкор қилинмаган. ОАВнинг ҳисоб-китобига кўра, автомобиллар учун тўланадиган умумий сумма 4,2 млрд долларга етиши мумкин.

Келишувга кўра, электромобиллар 2022 йил охиригача етказиб берилиши керак.

Шундан кейин Hertz’нинг бутун дунё бўйлаб ёйилган автопаркининг 20 фоизини электромобиллар ташкил қилади. Ҳозирда компания ижарага берилувчи 430-450 мингта автомобилга эга.

Hertz АҚШ ва Европада Tesla электрокарларини ноябрдан бошлаб ижарага бера бошлайди. Компания, шунингдек, электромобиллар учун қувватлаш станциялари қуришини эълон қилган. Жумладан, 2022 йил охиригача бундай станциялар сонини 65 та давлатда 3 мингтагача, 2023 йил охиригача эса 100 та давлатда 4 мингтагача етказиш режалаштирилган.

Ушбу янгиликлар ортида иккала компания акциялари ҳам 7 фоизга ошган. Эътиборлиси, Tesla акциялари нархи навбатдаги маротаба рекорд қайд қилган ва бир донаси нархи 978 долларга етган. Бундай кўрсаткичлар ортида Tesla’нинг бозор қиймати 1 трлн доллардан, компания асосчиси Илон Маскнинг бойлиги эса 250 млрд доллардан ошган.

Tesla капиталлашув даражаси бўйича бозор етакчилари - Apple, Microsoft каби компаниялардан ортда қолмоқда. Бироқ у 1 трлн долларлик капиталлашувга энг тез эришган компанияга айланди. 2003 йил июлда ташкил топган Tesla’га бунинг учун 18 йил талаб этилди.

Hertz яқинда банкротлик жараёнидан ўтди: компания йиғилиб қолган қарзлари ва пандемия ортида машиналар ижарасига талаб пасайгани сабабли 2020 йил май ойида банкротликдан ҳимоялашни сўраган. Натижада дунёда машиналарни ижарага берувчи энг кекса компаниялардан бири инвестицион жамғармалар гуруҳи томонидан сотиб олинган.