Tesla рулсиз ва тепкисиз Cybercab автомобилини оммавий ишлаб чиқаришни бошлади

Бу икки йўловчига мўлжалланган икки эшикли тўлиқ автоном седан. Унда нафақат рул ва тепкилар, балки орқа кўриш ойналари, эшик тутқичлари ва ҳатто орқа ойна ҳам йўқ.

Фото: AP

Tesla раҳбари Илон Маск 2024 йилда илк бор намойиш этилган Cybercab электромобилини оммавий ишлаб чиқариш бошланганини эълон қилди. Бу футуристик дизайнга эга роботакси бўлиб, тепки ва рулдан маҳрум, шунинг учун инсон уни жисмонан бошқара олмайди.

Шу муносабат билан миллиардер 38 сониялик видео эълон қилди. Асосан салон ичидан олинган видеода ҳайдовчисиз машина конвеердан чиқиб, кўчага чиқаётгани кўрсатилган.

Биринчи серияли нусха февраль ойида ишлаб чиқарилган. Бу икки йўловчига мўлжалланган икки эшикли тўлиқ автоном седан. Унда нафақат рул ва тепкилар, балки орқа кўриш ойналари, эшик тутқичлари ва ҳатто орқа ойна ҳам йўқ.

Автомобилнинг бурчакли шакллари Cybertruck’га ўхшайди, лекин кичикроқ. Иккита катта эшик «чайка қаноти» тамойили бўйича юқорига кўтарилиб, салонга кенг йўл очади. Олд қисмида радиатор панжараси йўқ: унинг ўрнига бутун кенглиги бўйлаб ингичка LED чизиғи бўлган яхлит панел мавжуд.

Маск Cybercab бошқа моделларга қараганда арзонроқ бўлишини айтди. Аниқ нарх ҳозирча номаълум, бироқ аввалроқ у 30 минг доллардан камроқ қиймат ҳақида гапирган эди.

Энг қизиғи, компания ҳали АҚШ ҳудудида бундай машиналардан фойдаланиш учун рухсат олмаган. Бундан ташқари, автоном ҳайдаш тизими ҳали тўлиқ тайёр эмас, бусиз автомобил фойдасиз бўлади.