ЖССТ халқаро сафарлар учун коронавирусга қарши эмланган бўлишни талаб қилмасликни тавсия қилди.
Ташкилотнинг фавқулодда вазиятлар бўйича қўмитаси йиғилиши якунларига кўра, эмланганлик ҳақидаги талаб бирор давлатга кириш учун ягона шарт бўла олмайди. Шу сабабли ЖССТ сайёҳлардан эмланган бўлишни талаб қилишни тавсия этмайди.
Ташкилот экспертлари бу қарорни бир қатор давлатларда аҳолини эмлаш даражаси ҳамон паст экани билан асослашган. ЖССТ маълумотларига кўра, юқори даромадга эга давлатларда ҳар 100 кишига 133 доза вакцина қўлланган бир пайтда, паст даромадли давлатларда бу кўрсаткич бор-йўғи 4 дозани ташкил қилмоқда.
ЖССТ, шунингдек, баъзи давлатларда коронавирусга қарши эмлаш ҳали умуман бошланмаганини қўшимча қилган.
Халқаро ташкилот баёнотида таъкидланишича, давлатлар халқаро йўловчи ташувларига хавфлилик нуқтайи назаридан ёндашиши лозим, яъни зарурат юзага келганда рейслар сонини кўпайтириш ёки қисқартириш, ПЦР-тест топшириш талабини ёки карантин киритиш лозим.
Аввалроқ ЖССТнинг бош илмий ходими Сумья Сваминатан эмлаш пандемияни тўхтатиш учун етарли эмаслигини айтган.
