Коронавирус: Россияда янги антирекорд, Хитойда янги чекловлар

Жонс Ҳопкинс Университети маълумотларига кўра, бугунги кунда дунёда 246 миллиондан ортиқ киши коронавирусдан зарарланган, 5 миллионга яқин киши вафот этган.

Шу билан бирга, ҳозирда ҳафталик касалланиш ҳолатлари ёздаги кўрсаткичлар билан солиштирганда анча камроқ: ўтган ҳафтада бутун дунё бўйлаб 3 миллионга яқин киши касалланган, августда эса бир ҳафтада касалланганлар сони 4,5 миллионга етганди.

Аммо дунёнинг кўплаб мамлакатларида пандемиянинг янги тўлқини кузатилмоқда ва айрим давлатларда ҳукуматлар янги чеклов чоралари қўлламоқда. Вирус айниқса Шарқий Европа, хусусан Россияда, шунингдек Буюк Британияда тез тарқалмоқда.

Россияда пандемия бошидан буён энг кўп кунлик ҳолатлар қайд этилди - бир кунда 40 251 кишида касаллик аниқланди. Нисбатан энг кўп ҳолатлар Москвада рўйхатга олинмоқда - 7267 киши.

Сўнгги бир кунда Россияда коронавирусдан яна 1160 киши вафот этди. Бир кун олдин антирекорд қайд этилганди - 1163 ўлим - бу пандемия давридаги энг юқори кўрсаткичдир.

Шанба куни Россияда мажбурий таътил бошланади - Россия президенти Владимир Путин ўтган ҳафтада 30 октябрдан 7 ноябргача бўлган кунларни эпидемиянинг янги тўлқини темпини пасайтириш мақсадида ишланмайдиган кунлар режими эълон қилганди.

Москвада қатъий чекловлар пайшанба куни бошланиб кетган - кафе ва ресторанлар ёпилган, дўконлар ишламаяпти - фақат биринчи навбатда зарур маҳсулотлар сотувчиларидан ташқари. Дорихоналар ҳам очиқ. Амалда хизмат кўрсатиш соҳасидаги деярли барча муассасалар фаолияти тўхтатилган - гўзаллик салонларидан тортиб шиномонтажгача.

Россияда коронавируснинг навбатдаги тўлқини сентябрь ойи охирида бошланди. Сўнгги бир ой ичида мамлакатда касалланиш даражаси икки баробар ортди. Сўнгги ҳафталарда деярли ҳар куни рекорд кўрсаткичлар (ҳам касалланиш ва ҳам ўлим ҳолатлари) янгиланди.

Ҳукумат ковиддан ўлим даражаси юқорилигини аҳолининг катта қисми вакцина қабул қилмагани билан изоҳламоқда.

Олимпиадагача юз кун

Пекинда ўтказиладиган Қишки олимпиадага юз кундан камроқ вақт қолди ва ҳукумат касаллик тарқалишининг ҳар қандай даражасини бартараф этиш учун қатъий чоралар кўрмоқда. Хитой ковидга умуман тоқатсизлик қилмаслик сиёсатини давом эттирмоқда, яъни ҳукумат вирусни тўлиқ йўқ қилишга интилмоқда.

Ўтган бир кунда Хитойда 78та янги касалланиш ҳолати рўйхатга олинган - бу 16 сентябрдан кейинги, сўнгги олти ҳафтадаги максимал кўрсаткичдир. Хитойнинг айрим шимолий ҳудудларида карантин киритилган, миллионлаб кишилардан тест олинган.

Хитой соғлиқни сақлаш ишлари бўйича қўмитаси вакили Ми Фэн эпидемия ҳамон тез суръатларда тарқалаётганини тан олган. Пекиннинг марказий туманларидан бири Сичэнда, миллиондан ортиқ киши яшайдиган ҳудудда 14 ноябрга қадар барча кинотеатрлар ёпиқ бўлади. Ҳукумат пекинликларга шаҳарни заруратсиз тарк этмасликни, шунингдек режалаштирилган ҳар қандай оммавий тадбирларни, масалан тўйларни кейинроққа кўчиришни тавсия этмоқда.

Янги ҳолатлар қайд этилган провинцияларда қатъий коронавирус чекловлари жорий этилган, аҳолига уйдан фақат биринчи навбатда зарур бўлувчи маҳсулотлар хариди учунгина чиқиш сўралмоқда. Ҳаракатланишга қўйилган чекловлар 6 миллиондан ортиқ кишини қамраб олган.

ЖССТ янги вирус пайдо бўлишини прогноз қилди

Келажакда Ер юзида инсоният назорат қила олмайдиган хавфли вирус пайдо бўлади. Бу ҳақда ЖССТ раҳбари Тедрос Гебрейесус G20 давлатлари молия ва соғлиқни сақлаш вазирларининг Римда ўтказилган йиғилишида маълум қилди.

У Ерда тарқалишини тўхтатиб бўлмайдиган яна бир вируснинг пайдо бўлиши «биология нуқтайи назаридан шубҳасиз» ҳисобланишини айтиб ўтди.

«Ушбу пандемияни тугатсак ҳам, биз у берган дарсдан хулоса чиқаришимиз ва кейингисига тайёрланишимиз керак. Биология нуқтайи назаридан қайсидир онда биз шунчаки ушлаб тура олмайдиган вируснинг пайдо бўлиши шубҳасиз», деди у.

У «юқори даражадаги хавфлар»га қарши курашда «юқори даражадаги сиёсий иштирок» зарурлигини таъкидлаган.

ЖССТ раҳбари, шунингдек, дунёда вакциналардан фойдаланишда тенглик йўқлигига эътибор қаратиб, ҳозирда вирусга қарши сайёра аҳолисининг 36 фоизи тўлиқ эмлангани, Африкада эса ушбу кўрсаткич «атиги 6 фоиз» эканини эслатиб ўтган.

Дунёда яна нималар бўлмоқда?

• Тинч океанидаги Тонга ороли ҳам энди коронавирусдан холи ҳудуд эмас. Полинезия қироллигидаги илк касалланиш ҳолати Янги Зеландиядан келган туристда қайд этилган. У тўлиқ эмланган ва саёҳатдан олдин изоляцияда бўлганди. Мамлакат бош вазири Похива Туионетоа аҳолини эҳтимолий локдаун ҳақида огоҳлантирган. Шундан кейин тонгаликлар шошилинч равишда вакцина қабул қилишга киришишди. Қироллик аҳолисининг 31 фоизга яқини тўлиқ эмланганди.
• Руминияда янги чекловлар кучга кирган - соат 22:00 дан эрталабки соат 5:00гача комендантлик соати амал қилади, шунингдек, ёпиқ бинолар ичида тиббий ниқоб тақиш мажбурий ҳисобланади. Сўнгги кунларда мамлакатда ҳар куни ўртача 400-500 киши коронавирусдан вафот этмоқда. Руминияда коронавирусдан ўлим даражаси миллион кишига 230дан ортиқни ташкил этади. Евроиттифоқда бу кўрсаткич - ҳар миллионга 24 ўлим ҳолатига тенг. Ёзда Руминия ўз ҳудудида вакцинага талаб пастлиги вакцина партияларини Ирландия, Дания ва Вьетнамга сотганди.
• Чехияда ҳам чекловлар амал қилмоқда; Польша ҳукумати янги карантин чораларини жорий этилишини истисно этмаяпти, аммо мамлакатда тўлиқ локдаун киритилиши режалаштирилмаган.
• Австралия янги касалланиш тўлқинининг олдини олиш мақсадида аҳолини аралаш вакциналар билан бўлса ҳам эмламоқчи. Сидней ва Мельбурнда вазият яхшиланиб, антивирус чекловлари юмшатилмоқда.
• АҚШда 1 ноябрдан 5-11 ёшлиларни ҳам эмлаш бошланади.