Туркиянинг бешта супермаркетлар тармоғи “қиммат нархлар” учун йирик жаримага тортилди

Туркиянинг бешта етакчи супермаркетлар тармоғи ва иккита етказувчи компания “қиммат нархлар” учун умумий ҳисобда 2,6 млрд турк лираси (270 млн доллар) миқдорида жаримага тортилди. Бу ҳақда Туркия антимонопол ташкилотига таяниб CNN Türk телеканали хабар берди. 

Жумладан, BİM Birleşik Mağazalar AŞ (99797838 доллар жарима), CarrefourSA Carrefour Sabancı Ticaret Merkezi AŞ (14839517 доллар), Migros Ticaret AŞ (53920309 доллар) тармоқлари жаримага тортилган.

Телеканал маълумотларига кўра, бу борадаги антимонопол тергов бир неча ой олиб борилган. Туркия президенти Ражаб Тоййиб Эрдўғаннинг товарларнинг аксарияти ушбу бешта супермаркетлар тармоғида мужассамлашганини танқид қилгандан кейин савдо вазирлиги ушбу тармоқларга ўз инспекторларини текширув ўтказгани жўнатган.

Тармоқлардан баъзилари антимонопол идоранинг қарори бўйича шикоят қилишни режалаштирмоқда. Чакана савдогарлар уюшмаси раҳбари Ғолиб Айкачнинг таъкидлашича, Туркиядаги юқори даражадаги инфляцияда савдо тармоқлари айбдор қилинмоқда.

21 октябрда турк лирасининг долларга нисбатан курси антирекорд қайд қилиб, бир доллар учун 9,43 лирага етган.