Эрдўған Туркия талаблари бажарилмагани сабабли Глазгодаги саммитда иштирок этишдан бош тортди

Туркия президенти Ражаб Тоййиб Эрдўған Глазгода иқлим бўйича COP26 саммитида иштирок этиш режасини бекор қилди. Эрдўғаннинг бундай қарорга келишига анжуман ташкилотчиларининг Туркиянинг хавфсизлик бўйича талабларини бажармагани сабаб бўлди.

Фото: Reuters

Шотландияда 31 октябрда ўз ишини бошлаган саммитда 100 дан кўпроқ президент ва бош вазирлар иштирок этиши кутилмоқда. 

Туркия президенти Римдаги “Катта йигирматалик” саммитидан кейин Шотландияга келиши кутилганди. Бироқ Эрдўған Италия пойтахтидан тўғри Туркияга йўл олган.

Reuters ахборот агентлигининг хабар беришича, Анқара Глазгодаги саммитда хавфсизлик стандартлари бўйича ўз талабларини қўйган, бироқ улар тўлиқ қаноатлантирилмаган. Жумладан, Анқаранинг президентга ҳамроҳлик қилувчи автомобиллар сонига тааллуқли талаби бажарилмаган.

“Биз Глазгодаги анжуман олдидан талаб қилган муайян хавфсизлик баённомалари бор. Бу бизга ва барча етакчиларга хорижий сафарларида қўлланувчи стандартлардир. Бироқ анжуман ташкилотчилари охирги лаҳзада ушбу баённомаларни қаноатлантира олмасликларини айтишди”, деб изоҳ берган вазиятга Туркия президенти.

Унинг айтишича, кейинроқ анжуман ташкилотчилари “Туркия талаб қилган стандартларни бошқа давлат учун истисно тариқасида қаноатлантиргани” аниқланган. “Бу дипломатия асосларига зид ва биз учун номақбул. Шу сабабли биз қатъий оҳангда музокараларни давом эттирдик. Борис Жонсон (Британия вазири) бу муаммога эътиборини қаратди. Дастлаб у муаммо ҳал бўлганини, бироқ кейин Шотландия муаммо туғдираётганини айтди. Шу сабабли биз Глазгога боришдан бош тортдик”, деб қўшимча қилган Эрдўған.  

Туркия президенти Глазгода хавфсизлик баённомалари билан боғлиқ вазиятда “гап нафақат шахсий хавфсизлик, балки Туркия обрўйи ҳақида борганини” айтган. “Биз давлатимиз обрўйини ҳимоялаш учун масъулмиз ва унга зиён етказилишига йўл қўймаймиз. Биз уларга адолатли дунё фақат ҳаммага бирдек ёндашув негизидагина қурилиши мумкинлигини кўрсатиб қўйдик”, деб таъкидлаб ўтган Эрдўған.

Туркия парламенти ўтган ҳафта “Катта йигирматалик” давлатлари орасида охирги бўлиб иқлим бўйича Париж келишувини ратификация қилди.