Facebook ижтимоий тармоғи Қозоғистон ҳукуматига контент ҳақида ички билдирув тизими (CRS)га тўғридан тўғри эксклюзив рухсат бермоқда. Бунга сабаб қилиб «Интернетда болалар ҳуқуқини ҳимоя қилишга йўналтирилган, зарарли контентларга қарши курашиш» кўрсатилмоқда.
Бу ҳақда Қозоғистон Республикаси Ахборот ва жамоатчилик тараққиёти вазирлиги хабар қилмоқда.
Қозоғистон Facebook’нинг CRS тизимига уланган Марказий Осиёдаги илк давлат бўлди. Вазирликнинг қайд этишича, улар аллақачон контент сиёсатига жавоб берувчи тўғридан тўғри каналга уланишган.
28 октябр куни Facebook вакиллари CRS билан ишлаш бўйича Қозоғистон ахборот вазирлиги мутахассисларига тренинг ўтишган. Вазирлик тизим билан ишлашга ноябр ойининг бошидан киришишни режалаштираётган эди.
Қозоғистон парламенти сентябр ойида ижтимоий тармоқлар ва мессенжерларни мамлакат ҳудудида ваколатхона очишга мажбурловчи қонун лойиҳасини биринчи ўқишдаёқ қабул қилган эди. Муаллифлар қонунчиликка ўзгартиришлар киритиш заруриятини кибербуллингга қарши кураш билан асослашган эди.
