Кореяга бормоқчи бўлган мигрантларга қўйиладиган талаблар рўйхати эълон қилинди

Ташқи меҳнат миграцияси агентлиги Корея Республикасида ишлашни режалаштираётган фуқароларга махсус маълумот билан чиқди.

Корея Бандлик ва меҳнат вазирлиги расмий баёнотига кўра, жорий йилнинг ноябрь ойи охирида ишчи кучи жўнатувчи барча давлатлар, шу жумладан Ўзбекистондан Е-9 ишчи визаси билан меҳнат мигрантларини қабул қилиш жараёни тикланиши режалаштирилган.

Бунинг учун фуқаролардан:

• Корея Республикасида тан олинган вакциналар (Astrazeneca, Moderna, Pfizer, Sinovac, Sinopharm, Janssen)дан бири билан Корея Республикасига кириб боришдан камида 14 кун олдин тўлиқ эмланган бўлиши;
• Корея Республикасининг Ўзбекистондаги элчихонаси томонидан тан олинган лабораториялар (Korea No 1 Laboratory, SWISS LAB, De Factum Laboratories, INTERMED Innovation)дан бирида Корея Республикасига кириб боришдан олдин 72 соат ичида ПЦР тест топширган ва тест натижаси манфий бўлиши талаб этилади.

Шунингдек, Корея Республикасига кириб борган меҳнат мигрантлари аввалгидек 14 кун эмас, балки 10 кунлик карантин даврини ўташи лозим бўлади.

Корея Инсон ресурсларни ривожлантириш хизматининг маълум қилишича, Ўзбекистон Республикасидан меҳнат мигрантларининг Е-9 ишчи визаси билан кириб бориш тартиби ва сони бўйича маълумот Корея Республикасининг Ўзбекистондаги “EPS” маркази орқали қўшимча етказилади.

Аввалроқ, Корея меҳнат мигрантлари учун чекловларни бекор қилишни режалаштираётгани хабар берилганди.