Молия вазирлиги каронавирусга қарши кураш тадбирларига қанча маблағ сарфланганини очиқлади

Жорий йилнинг 1 октябрь ҳолатига кўра, вакцина сотиб олиш ва фуқароларни эмлаш ишларини ташкил этиш харажатлари 1,4 трлн сўмни ташкил этган.

Молия вазирлиги соғлиқни сақлаш йўналишидаги харажатлар тўғрисидаги маълумотларни очиқлади.

Қайд этилишича, 2020 йилда коронавирусга қарши курашиш тадбирлари учун инқирозга қарши курашиш жамғармаси маблағлари ҳисобидан 3,84 трлн сўм маблағ сарфланган.

Шундан 2,52 тлрн сўм 381 минг 299 нафар тиббий ва бошқа ходимларни қўшимча рағбатлантириш учун, 703, 8 млрд сўм дори-дармон, тиббиёт буюмлари, гигиена ва зарарсизлантирувчи воситалар харид қилишга, 247,1 млрд сўм озиқ-овқат ва бир марталик ошхона буюмлари харажатлари учун, 133,9 млрд сўм тиббиёт жиҳозлари ва транспорт воситаларини сотиб олиш учун, 233 млрд сўм бошқа харажатлар (дезинфекция, транспортировка, коммунал тўловлар ва ҳ.к.) учун йўналтирилган.

«2021 йил учун Ўзбекистон Республикасининг Давлат бюджети тўғрисида»ги қонунида Covid -19га қарши кураш тадбирлари учун 3 трлн сўм ажратиш кўзда тутилган эди. Эпидемиологик вазиятнинг ёмонлашиши ва коронавирус билан касалланган беморлар сони ортиши сабаб ушбу маблағлар миқдори 4,3 трлн сўмга етказилган, шундан вакцина сотиб олиш ва фуқароларни эмлаш ишларини ташкил этиш харажатлари 1,4 трлн сўмни ташкил этган.

Covid-19га қарши эмлаш кампанияси бошлангандан буён октябрь ойигача 23,8 млн доза вакцина ишлатилган. Эмлаш ишлари бир нечта препаратларда амалга оширилмоқда: Россиянинг «Спутник V», узбек-хитой ҳамкорлигида чиқарилган ZF-UZ-VAC 2001, Швеция-Британиянинг AstraZeneca ва АҚШнинг Moderna. Октябрь ойига қадар тўлиқ эмланганлар (барча дозасини олганлар) фуқаролар сони 5,7 млн нафарга етган.

Маълум қилинишича, давлат бюджетидан соғлиқни сақлаш соҳасига ажратиладиган маблағлар ҳажми ЯИМнинг 3,1 фоизини ташкил этган.