Толиблар қамоқхоналарда ҳарбийларни ушлаб туришда айбланди

Фото: Reuters

Афғонистонда ҳокимиятни эгаллаган “Толибон” жангарилари мамлакат қамоқхоналарида ҳарбийларни ушлаб турибди. Бу ҳақда Афғонистоннинг собиқ вице-президенти Амруллоҳ Солиҳ Twitter’да маълум қилди.

Сиёсатчи толиблар қамоқхоналарда ИШИД жангариларини ушлаб тургани ҳақида ёлғон гапираётганини айтган. Унинг таъкидлашича, қамоқхоналарда Афғонистон миллий мудофаа ва хавфсизлик кучлари ҳарбийлари сақланмоқда. Солиҳ толиблар ҳамон қамоқхоналарга журналистларга ташриф буюришга рухсат бермаганини таъкидлаб ўтган.

Аввалроқ “Афғонистон миллий қаршилик фронти” вакили Али Майсам Назарий толиблар ИШИД ва “Ал-Қоида” террорчилари билан яқин алоқаларни сақлаётганини айтган. Унинг айтишича, толиблар халқаро террорчилик билан чамбарчас боғланган бўлиб, улар ҳар куни ушбу террорчи гуруҳлар аъзоларига ёрдам кўрсатмоқда.