Жамолиддин Бобожонов: «Келаси йилдан Суперлигада жамоалар сони 16тага оширилса, бу – жиноят»

Сўнгги кунларда ижтимоий тармоқларда, айрим ОАВ нашрларида Ўзбекистон Суперлигасида келаси йилдан жамоалар сони 16тага етказилиши, бу мавсум якунларига кўра ҳеч бир жамоа Про лигага тушиб кетмаслиги ҳақида миш-мишлар тарқала бошлади. Футбол ичидаги инсонлар, жумладан, «Локомотив» матбуот котиби Хайрулла Холиқов, «Навбаҳор» маслаҳатчи мураббийи Самвел Бабаян ҳам жамоалар сонини ошириш керак деган фикрни илгари суришди. Суперлигани тарк этиши маълум бўлгач, «Андижон» мухлислари ЎФА раҳбари Абдусалом Азизовга видеомурожаат йўллашди. Унда мухлислар клублар сонини 16тага етказиш, шу орқали севимли жамоаларини юқори дивизионда олиб қолишни илтимос қилишди.  

«Ориат Доно» радиосида эфирга узатиладиган «Футбол плюс» ток-шоусида журналист Жамолиддин Бобожонов юқоридаги воқеаларга ўз муносабатини билдирди.

«Келаси мавсумда Суперлигада жамоалар сони 16тага етказилса, аввало, принципсизлик бўлади. 4-5 жамоа шунча вақт лигада қолиш учун нега курашди? Чемпионатни Суперлигага айлантириш учун 3-4 йил давомида қилинган ишлар бир тийинга чиқади. 

Керак бўлса, 100та жамоа қилишсин. Аммо регламентга амал қилиш керак. 16та жамоага ўзгартириш керак бўлса, аввал регламентга киритинглар. Майли, 2023 йилдан шундай бўлсин. Мавсум бошида жамоалар нима учун ўйнаётганини билсин. 

Адолатли, қонунан амалга оширинглар. «Сурхон» Суперлигага тортилганидек бир қўнғироқ билан футболимиз шундай йўлдан кетаверса… Бошқа мамлакатларда бундай ҳолатлар йўқ-ку. «Ньюкасл» сўнгги ўринларда юрибди, лекин шайхлари АПЛ раҳбарига қўнғироқ қилишига ишонасизларми? Агар нимадир бўлиб, келаси йилдан жамоалар сони 16тага ўзгарса, бу – жиноят.

Про лигага тушиб кетиши аниқ бўлган жамоа мухлислари ҳаром йўл билан чемпионатда дабдурустдан 16та жамоа бўлишига рози. 30 йилдан бери шу аҳвол. Сунъий равишда олиб қолинган жамоалар ҳеч қанақасига ўзгаргани йўқ. Пойдевор нотўғри қўйилар экан, бундай жамоаларнинг косаси ҳеч қачон оқармайди!

Илтимос, одамлар бу жамиятда қонун ишлашига ишонсин. Қонун бузилишини талаб қилманглар. Аксинча, клубдан, мураббий ва футболчилардан натижа сўранглар. Ундан кўра футболчилар мухлислардан кечирим сўраб, келаси йил яхши ўйнаб Суперлигага қайтишга ваъда беришсин», – дейди Бобожонов.