Давлат геология қўмитаси олтин конлари бўлган иккита янги майдонни онлайн-аукционга қўйди. Бу ҳақда Spot хабар бермоқда.
Улардан бири — Булуткон бўлиб, Навоий вилояти Учқудуқ туманида жойлашган. Олтин қазиб олиш лицензиясининг бошланғич нархи 189,3 миллион сўмни ташкил этади.
Аукцион 28 декабрь куни бўлиб ўтади, аризалар 26 декабрга қадар қабул қилинади. Аукцион ғолиблари 3 йил муддатга омонатдан фойдаланиш ҳуқуқи ва тегишли лицензияга эга бўлади.
Иккинчи ҳудуд Навоий вилоятининг Томди туманидаги 1451 гектар майдонда жойлашган Кинир бўлиб, геологик рухсатноманинг бошланғич нархи — 223 миллион сўм. Тендер савдолари 23 декабрга белгиланган, аризалар 21 декабрга қадар қабул қилинади.
Аукционда иштирок этиш учун электрон аукционга ариза топшириш ва участканинг баҳоланган қийматининг 5 фоизи миқдорида гаров тўлаш талаб этилади.
