Байден Трампнинг мигрантлар тўғрисидаги қонунини қайта тиклайди

АҚШ президенти Жо Байден маъмурияти собиқ давлат раҳбари Доналд Трампнинг «Мексикада қолинг» деб норасмий ном олган иммиграцион дастури амал қилишини тиклайди. Бу ҳақда NBC News хабар берди.

Телеканал маълумотига кўра, келаси ҳафтада АҚШ ва Мексика ҳукумати ўртасида келишув имзоланганидан сўнг мигрантларни ҳимоя қилиш тўғрисидаги протокол яна ишга тушади.

«Мексикада қолинг» дастури Байден ҳокимиятга келганидан сўнг бекор қилинганди. Унда АҚШдан бошпана сўраганлар Мексикада ушбу сўров бўйича суд қарори чиққунига қадар кутишлари кўзда тутилган.

Турли ҳуқуқни ҳимоя қилиш ташкилотларининг фикрича, бу мигрантлар ҳаётига хавф туғдирган.

Мазкур дастурнинг қайта тикланиши мамлакат олий суди Байден маъмурияти дастурни бекор қилиши ноқонунийлигини билдирган Техас штати федерал судьясининг тарафини олгани билан боғлиқ. Оқ уй суд қарорига қаршилик кўрсатишга уринди, аммо якунда ютқазди.