Европарламент раиси ўринбосари Пекиндаги Олимпиада ўйинларини “умумий бойкот” қилиш кераклигини айтди

Европарламент (ЕП) раиси ўринбосари Никола Бер Пекиндаги 2022 йилги қишки Олимпиада ўйинларини умумий бойкот қилиш кераклигини айтди. 

“Европа иттифоқи АҚШ соясида қолмаслиги керак, аксинча, инсон ҳуқуқларига риоя қилиниши масаласида олдинда туриши ва қишки Олимпиада ўйинларини умумий бойкот қилишга чақириши керак”, — деди Бер.

Унинг қўшимча қилишича, АҚШ эълон қилган дипломатик бойкот сал кечикиброқ амалга оширилди.

“АҚШ ҳам, ЕИ ҳам Хитой инсон ҳуқуқларини очиқчасига бузиб турган вақтда Пекинда қишки ўйинлар ўтказилишини жимгина кузатиб туришдан манфаатдор эмас”, — деб таъкидлади Европарламент раиси ўринбосари.

6 декабрда АҚШ Хитой томонидан инсон ҳуқуқлари бузилишига жавобан Пекин Олимпиадасига расмий ва дипломатик шахсларини юбормаслигини эълон қилганди.

8 декабрда Австралия ҳам Пекин Олимпиадасига бойкот эълон қилди.

XXIV қишки Олимпиада ўйинлари 2022 йилнинг 4-20 февраль кунлари Пекинда бўлиб ўтади.