Зеленский ўзаро учрашувни келишиб олиш учун Путинга қўнғироқ қилишга тайёрлигини айтди

Украина президенти Владимир Зеленский ўзаро учрашув масаласини келишиб олиш учун Россия президенти Владимир Путинга қўнғироқ қилишга тайёрлигини айтди.

«Маъмуриятларимиз кун тартиби қандай бўлиши борасида гаплашишмоқда, агар улар мураккаб ҳужжатлар бўйича келиша олишмаса, мен тўғри унга қўнғироқ қиламан», — деди Зеленский.

Владимир Зеленскийнинг сўзларига кўра, ҳозирда Украина ва Россия етакчилари ўртасида ҳеч қандай мулоқот йўқ, аммо у ҳар қандай шаклдаги учрашувга тайёр.

«Биз мулоқотга тайёрлигимизни очиқчасига айтамиз. Бизга Россия томони тайёрлигини айтиши керак. Биз Россия Федерацияси билан ҳар қандай шаклда учрашишга тайёрмиз. Биз юзма-юз мулоқотга ҳам тайёрмиз, қандай шаклда бўлишининг аҳамияти йўқ», — деди Украина президенти.

Аввалроқ Зеленский Донбасс масаласида референдум ўтказилиши ва Путин билан музокаралар олиб бориши мумкинлигини истисно қилмаслигини айтганди.