Ногиронлиги бўлган шахслар орасида республика танловлари ўтказиб борилади

Ногиронлиги бўлган шахслар орасида уларнинг ҳаётини яхшилашга қаратилган энг яхши ижтимоий лойиҳаларни рағбатлантириб бориш мақсадида 2022 йилдан бошлаб республика танловлари ташкил этилади ва ўтказиб борилади. Бу ҳақда президентнинг “Ногиронлиги бўлган шахсларни ҳар томонлама қўллаб-қувватлаш, уларнинг бандлигига кўмаклашиш ҳамда ижтимоий фаоллигини янада оширишга оид қўшимча чора-тадбирлар тўғрисида”ги қарорида айтилмоқда.

Ҳужжатда белгиланишича, танловлар қуйидаги номинацияларда ўтказилади:

• Иқтисодий тараққиёт ва камбағалликни қисқартириш вазирлиги томонидан – “Энг яхши ижтимоий лойиҳа”;

• Савдо-саноат палатаси томонидан – “Энг яхши тадбиркор”;

• Олий ва ўрта махсус таълим вазирлиги томонидан – “Энг яхши талаба”;

• Туризм ва спорт вазирлиги томонидан – “Энг яхши спортчи”;

• Маданият вазирлиги томонидан – “Энг яхши китобхон”;

• Бандлик ва меҳнат муносабатлари вазирлиги томонидан – “Энг яхши иш берувчи”.

Танлов натижалари ҳар йили “3 декабрь – Xалқаро ногиронлар куни” арафасида эълон қилинади ҳамда танлов ғолиблари ташкилотчиларнинг бюджетдан ташқари манбалари ҳисобидан базавий ҳисоблаш миқдорининг 100 баравари миқдорида бир марталик пул мукофоти билан рағбатлантирилади.