Зангиотада очилган МЧЖ номини ўзгартирди. Унинг таъсисчиси «замминистр»нинг иккинчи хотини воқеаси орқали танилган аёл бўлиб чиқди.
Тошкент шаҳар ИИББ ЙҲХБ томонидан ўтказилган тунги рейд тадбирида ўзини «замминистр»нинг иккинчи хотини» деб таништириб, жанжал кўтаргани ортидан танилган Мадинабону Эшонқулова номи «VTORAYA JENA ZAMMINISTRA» МЧЖга ўзгарган корхона таъсисчиси ҳисобланади.
Фирманинг аввалги номи «PAIDO LOW CALORIE DRINK» МЧЖ бўлган. Корхона 2021 йил 29 сентябрь куни Тошкент вилояти Зангиота тумани Давлат хизматлари маркази томонидан рўйхатдан ўтказилган.
Мазкур жамият 2021 йилнинг 22 декабрь куни қайта рўйхатдан ўтказилган ва корхона номи «PAIDO LOW CALORIE DRINK» МЧЖдан «VTORAYA JENA ZAMMINISTRA» МЧЖга ўзгартирилган.
МЧЖ устав капитали 10 млн сўм этиб белгиланган ва расмий маълумотларда Эшонқулова Мадинабону Жуманазаровна корхонанинг ягона эгаси сифатида қайд этилган.
Давлат хизматлари агентлиги муҳокамага сабаб бўлган фирма номи, тадбиркор билан олиб борилган тушунтиришлардан сўнг белгиланган тартибда ўзгартирилганини маълум қилди.
Мадинабону Эшонқулова 30 июль куни Учтепа туманида ўтказилган махсус рейд тадбирида ЙПХ инспекторининг тўхташ ишорасига бўйсунмай ҳаракатини давом эттиргани, мажбуран тўхтатилган вақтда ўзини «замминистр»нинг иккинчи хотини деб таништириб, жанжал кўтаргани ортидан ижтимоий тармоқларда муҳокамаларга сабаб бўлганди. Ҳолат тасвирланган лавҳа UzReport телеканали орқали эфирга узатилган.
«Мен ‘замминистр’нинг иккинчи хотини бўламан. Ҳозир телефон қиламан, мана шу камерангиз учун жавоб берасиз», – дея машина бошқарувидаги аёл ЙПХ ходимига ҳужжатларини тақдим этмаганди. Унинг ёнидаги эркак эса оператор ва ЙПХ ходимларига қўполлик қилиб, куч ишлатган. Ёрдамга етиб келган тезкор ходимлар зўравонни ички ишлар идорасига олиб кетган.
Ички ишлар органлари ходимининг қонуний талабига бўйсунмагани ва уларнинг фаолиятига қаршилик кўрсатгани учун Мадинабону Эшонқулова ҳамда унинг укасига нисбатан Маъмурий жавобгарлик тўғрисидаги кодекснинг тегишли моддаларига асосан маъмурий баённома расмийлаштирилиб, автоулов вақтинча жарима майдончасига жойлаштирилган ва ҳуқуқбузарлик содир этган шахсларга нисбатан суд томонидан тегишли жазо чоралари қўлланган.
Тошкент шаҳар ИИББ томонидан эълон қилинган расмий муносабатда Мадина Эшонқулованинг ҳеч қайси вазир ўринбосарига алоқаси йўқлиги аниқлангани таъкидланади.
Кейинчалик «Замминистр»нинг иккинчи хотини эканлигини айтиб, ЙПХ ходимларига пўписа қилган қоидабузар ҳайдовчи ёш актриса Мадина Эшонқулова экани маълум бўлганди.
Давлат хизматлари агентлиги «Фирма номлари тўғрисида»ги қонунга мувофиқ, фирма номида:
- давлатнинг расмий номи, халқаро, ҳукуматлараро ёки нодавлат нотижорат ташкилотининг қисқартирилган ёки тўлиқ номи;
- тарихий ёки Ўзбекистон Республикасида машҳур бўлган шахснинг тўлиқ ёки қисқартирилган исми, белгиланган тартибда бериладиган рухсатсиз;
- фирма номининг эгаси, унинг фаолият тури ёки у келиб чиққан мамлакат хусусидаги сохта ёки истеъмолчини чалғитиши мумкин бўлган белгилар;
- жамият манфаатларига, инсонпарварлик ва ахлоқ принципларига зид бўлган белгилар кўрсатилмаслиги кераклигини эслатган.
