Қашқадарёда тиббиёт ускуналарини 2,6 миллиард сўм қимматроққа сотиб олган мансабдорларга нисбатан жиноий иш очилди

Қашқадарё вилоятида 2020 йил ва 2021 йилнинг 1-ярим йили давомида 10 та тиббиёт муассасаси 75 дона, жами 7 млрд 817,6 млн сўмлик тиббий ускуналарни Қарши шаҳридаги МЧЖдан жуда қиммат нархларда бюджет маблағлари ҳисобига сотиб олган. Бу ҳақда Коррупцияга қарши курашиш агентлигининг тиббий ускуналар харид қилиниши қонунийлиги юзасидан ўрганиш натижаларида маълум қилинган.

Агентликнинг Kun.uz’га маълум қилишича, материаллар қонуний қарор қабул қилиш учун Бош прокуратура ҳузуридаги Иқтисодий жиноятларга қарши курашиш департаментига юборилган ҳамда бозор баҳосини аниқлаш бўйича экспертиза тайинланган.

«Х.Сулаймонова номидаги Республика экспертиза марказининг Қашқадарё вилояти бўлими экспертларининг дастлабки баҳолаш ишлари якунларига кўра, 65 дона, 43 турдаги тиббий ускуналар тиббиёт муассасалари томонидан 5 млрд 421,4 млн сўмга харид қилинган бўлса, эксперт хулосасига кўра, ҳақиқатда, 2 млрд 808,1 млн сўмлик қийматга эга эканлиги, яъни 2 млрд 613,3 млн сўмга қиммат нархларда сотиб олинганлиги аниқланди», — дейилади расмий маълумотда.

Маълум қилинишича, тиббий ускуналарни 2,6 миллиард сўм қимматроққа сотиб олганлик ҳолати юзасидан 2021 йил 16 декабрь куни таъминотчи жамият ва Қашқадарёдаги 9 та тиббиёт муассасалари мансабдор шахсларига нисбатан Жиноят кодексининг 167-моддаси (Ўзлаштириш ёки растрата йўли билан талон-торож қилиш) 3-қисми «а» банди билан жиноят иши қўзғатилган.

Ҳозирда вилоят прокуратураси томонидан тергов ҳаракатлари олиб борилмоқда.

Агентлик жуда қиммат нархларда бюджет ташкилотларига тиббий ускуналарни сотган МЧЖ номи айбсизлик презумпцияси нуқтайи назаридан ҳозирча очиқланмаслигини билдирди.