Хитойнинг «сунъий қуёш» лойиҳаси, кузовининг ранги ўзгарадиган BMW – ҳафта технологик дайжести

Кузовининг ранги ўзгарадиган BMW

BMW компанияси Лас-Вегасдаги CES 2022 кўргазмасида инновацион бўёқ схемасига эга iX электр кроссоверини намойиш этди.

Биргина тугмачани босиш билан BMW iX кузовининг ранги ўзгаради.

Компания шунингдек, iX M60 электр кроссоверининг кучайтирилган версиясини ҳам тақдим этди.

Электромобилнинг мотори қуввати 619 от кучига тенг. У 3,8 сония ичида тезлигини соатига 100 километрга етказа олади.

Хитойнинг «сунъий қуёш» лойиҳаси

Хитойнинг EAST термоядровий реактори синовдан ўтказилди, деб хабар берди Синхуа агентлиги.

Қайд этилишича, қурилма плазмаси Қуёшдан беш баравар кучлироқ қизиган ва “сунъий қуёш” 1056 сония ёки 17 дақиқа ишлаган.

Ушбу лойиҳадан мақсад, чексиз соф энергия ишлаб чиқаришдир.

Агентликнинг таъкидлашича, термоядровий энергия хавфли чиқинди ажратиб чиқармайди, «сунъий қуёш» учун керакли хомашё эса Ер юзида чекланмаган миқдорда топилади. Ёнилғи сифатида водород изотопларидан фойдаланилади.

Лойиҳа Хитойга 943 миллиард долларга тушган.

Энг қиммат компаниялар рейтинги

Америка IT-концернлари дунёнинг энг қиммат компаниялари рўйхатида етакчилик қилмоқда.

Бозор қиймати қарийб 3 трлн долларга етган Apple рўйхатда биринчи поғонада жойлашди. Компаниянинг бир дона акцияси нархи бир йил ичида 31 фоизга ошган.

Microsoft рўйхатда иккинчи ўринда бормоқда. Компания акциялари йил давомида 52 фоизга қимматлашган, бозор қиймати эса 2,57 трлн доллар деб баҳоланмоқда.

Учинчи ўринга жойлашган Alphabet компаниясининг бозор қиймати 1,96 трлн долларга етган.

Икки йил аввал дунё рейтингида биринчи ўринда бўлган Саудия Арабистонининг Saudi Aramco компанияси тўртинчи ўринга тушган. 

Ундан кейинги ўринни 1,72 трлн доллар капитализация билан Amazon эгаллаган.

Дунёдаги биринчи ёғоч сунъий йўлдош

Япония 2023 йилда дунёдаги биринчи ёғоч сунъий йўлдошни учиради. Бу ҳақда Kyodo агентлиги маълум қилди.

Япониялик мутахассисларнинг фикрича, космик аппаратни 10 сантиметрлик кичик квадрат шаклида қуриш режалаштирилмоқда. Сунъий йўлдошнинг ташқи қатлами ёғочдан ишланади. Унинг ташқи томонида қуёш батареялари, ички қисмида эса антеннали электрон жиҳозлар ўрнатилади.

Қайд этилишича, сунъий йўлдошларни ёғочдан ишлаш арзонроқ. Ҳозирги сунъий йўлдошлар алюминийдан қилинган.

Киото университети профессори Доининг сўзларига кўра, агар режа амалга оширилса, коинотга қизиқувчи болалар ҳам ўзларининг сунъий йўлдошларини яратишлари мумкин бўлади.

Sony ҳам электромобиллар ишлаб чиқармоқчи

Sony электромобиллар ишлаб чиқариш бўйича бўлинмасини ташкил этади. Бу ҳақда компания матбуот релизида айтилмоқда.

Компания раҳбари Кэнъитиро Ёсида Лас-Вегасдаги Consumer Electronics Show кўргазмасида электромобиллар бозорига кириш режалаштирилганини эълон қилди.

«Биз Sony электромобилларини ишлаб чиқаришни йўлга қўйиш имкониятини кўриб чиқмоқдамиз», — деди у.

Sony 2020 йилдаги кўргазмада Vision-S электромобили прототипини намойиш этганди. Ўша йилнинг декабрида электромобил Европа йўлларида синовдан ўтказилди.

Буюк Британия гипертовушли ракета ишлаб чиқишни режалаштирмоқда

Россияда гипертовушли ракеталар мавжудлиги боис Лондон гипертовушли қурол ишлаб чиқишни мўлжалламоқда. Бу ҳақда Буюк Британия мудофаа штаби бошлиғи Тони Радакин маълум қилди.

«Бизда бундай ракеталар йўқ, аммо бўлиши шарт», — деди Радакин.

У шунингдек, охирги 20 йил ичида Россия сувости кемаларининг фаоллиги мисли кўрилмаган даражада ошганини айтди. Радакиннинг сўзларига кўра, бу сувости кабеллари тизимига хавф солиши мумкин.

«Дунёдаги ахборот ва трафикнинг катта қисми айнан улар орқали ўтади», — деди Радакин. 

Россия президенти Владимир Путин ўтган йил декабрда Россия «Циркон» гипертовушли ракеталарини синовдан ўтказганини маълум қилганди.