Ўзбекистонда коронавируснинг омикрон штамми Дубайдан келган хориж фуқаросида аниқланган

Жорий йилнинг 7 январь куни Инновацион ривожланиш вазирлиги ҳузуридаги Илғор технологиялар маркази (ИТМ) лабораториясида омикрон штамми аниқланган.

Фото: Getty Images

Ўзбекистон ҳудудига Дубайдан келган хориж фуқаросида коронавируснинг янги штамми омикрон аниқланган. Республика махсус комиссиясининг йиғилишида мазкур ҳолат, шунингдек, омикрон тарқалишига қарши чора-тадбирлар муҳокама қилинди.

Воқеани шарҳлар экан, инновацион ривожланиш вазир ўринбосари Шаҳло Турдиқулова шундай деди:

“Омикроннинг дунё бўйлаб тез тарқалишини инобатга олсак, унинг Ўзбекистонда пайдо бўлиши вақт масаласи эди. Илғор технологиялар маркази раҳбари сифатида ZF-UZ-VAC2001 синовларида ва вирусли мутацияларни ўрганишда фаол иштирок этарканман, мамлакатимиздаги энг оммабоп Ўзбекистон-Хитой вакцинаси устида олиб борилган тадқиқотлар янги штамм бўйича яхши натижаларни кўрсатаётганини айтишим мумкин. Вакцинанинг кучайтирилган — бустер дозаси омикрондан деярли 100 фоиз ҳимоя қилади. Хитойлик ҳамкасбларимиз ҳам буни тасдиқладилар”.

Махсус комиссия йиғилишида аҳолини, шу жумладан ZF-UZ-VAC2001’нинг кучайтирилган дозалари билан эмлашни зудлик билан тезлаштириш масаласи ҳам муҳокама қилинди.