Вазирлар Маҳкамасининг “Электрон онлайн-аукцион ва танловларни ташкил этиш ҳамда ўтказиш тартибини такомиллаштириш бўйича қўшимча чора-тадбирлар тўғрисида”ги қарори қабул қилинди.
Ҳужжат президентнинг "Шартномавий муносабатларни тубдан такомиллаштириш чора-тадбирлари тўғрисида"ги фармони ва "Электрон онлайн-аукционни ўтказиш тартибини соддалаштириш, унинг шаффофлигини ошириш ҳамда иштирокчилар ҳуқуқларининг ишончли ҳимоясини кафолатлаш чора-тадбирлари тўғрисида"ги қарорига мувофиқ қабул қилинди.
Қарор билан қуйидагилар тасдиқланди: "E-auksion" электрон савдо платформасида электрон онлайн-аукцион ва танловларни ташкил этиш ҳамда ўтказиш тартиби тўғрисидаги низом; "E-auksion" электрон савдо платформасига интеграция қилинадиган манфаатдор вазирликлар, идоралар ва ташкилотлар рўйхати.
Низом Давлат активларини бошқариш агентлиги ҳузуридаги "Электрон онлайн-аукционларни ташкил этиш маркази" ДУК томонидан "E-auksion" электрон савдо платформасида электрон онлайн-аукцион ва танловларни ташкил этиш ҳамда ўтказиш тартибини белгилайди.
Унда қуйидаги нормалар мавжуд: электрон-аукцион ва танловни ўтказилмаган деб ҳисоблаш ва уларни такрорий ўтказиш тартиби; ҳисоб-китоб қилиш ва аукцион ҳамда танлов натижаларини расмийлаштириш тартиби; ижро ҳужжатлари бўйича объектларни электрон онлайн-аукционга чиқариш ва сотишнинг ўзига хос хусусиятлари; ер қаъри участкаларидан фойдаланиш ҳуқуқини савдо платформасида сотишнинг ўзига хос хусусиятлари.
Рўйхатга 13 та давлат ҳокимияти органи киритилган. Рўйхатга изоҳда қуйидагилар назарда тутилган: вазирликлар, идоралар ва бошқа ташкилотлар тизимга электрон ҳукуматнинг идоралараро маълумотлар узатиш тармоғи орқали белгиланган тартибда уланади; ташкилотлар ўртасида ўзаро маълумот алмашиш хизматлари бепул амалга оширилади; "Электрон онлайн-аукционларни ташкил этиш маркази" ДУК томонидан заруратга қараб бошқа ташкилотлар билан ўзаро келишув асосида "E-auksion" электрон савдо платформасига интеграция қилиниши мумкин.
Қарор билан айрим қонун ҳужжатларига ўзгартириш ва қўшимчалар ҳам киритилди. Ҳужжат қонун ҳужжатлари маълумотлари миллий базасида эълон қилинган ва 13.01.2022 йилдан кучга кирди.
