Энг сердаромад YouTube блогерлари ва янги смартфонлар – ҳафта технологик дайжести

Honor букланувчи смартфонини тақдим этди

Хитойнинг Honor компанияси Honor Magic V деб номланган биринчи букланувчи смартфонини тақдим этди.

Қурилма 2272х1984 пиксел бўлган 20 сантиметрли ички дисплей билан жиҳозланган. Унинг ташқи дисплейи 16,4 сантиметр бўлиб, 2560x1080 пикселга тенг.

Смартфоннинг қалинлиги 6,7 мм ва узунлиги 141,1 мм. Букланган ҳолда эса ўлчами мос равишда 14,3 мм ва 72,7 мм.

Гаджет Snapdragon 8 Gen 1 процессори ва 4750 мА/с батареяга эга. Батарея 15 дақиқа ичида 50 фоиз қувват олади.

Смартфоннинг оператив хотираси 12Гб, ички хотираси эса 256 ёки 512 Гб.

Honor Magic V учта 50 мегапикселли камера ва 42 мегапикселли селфи-объектив билан жиҳозланган.

Смартфон нархи 9999 юанни (1575 доллар) ташкил этади.

Xiaomi'дан 12та янги смартфон

Хитойнинг Xiaomi компанияси 12та янги смартфони устида иш олиб бормоқда. Бу ҳақда Xiaomiui сайти хабар берди.

Қурилмалар турли - Xiaomi, Redmi ва Poco брендлари остида ишлаб чиқарилади.

Сайт манбасининг сўзларига кўра, барча моделлар апрел ойида тақдим этилади.

Бўлажак тақдимот тўғрисида компаниянинг Ҳиндистондаги бошқарувчи директори ва вице-президенти Ману Кумар Жайн ҳам маълумот берган. У Redmi Note туркумидаги янги смартфон тизерини намойиш этган.

Энг сердаромад YouTube блогерлари

Forbes журнали ўтган йил натижалари бўйича YouTube платформасида энг кўп даромад топган блогерлар рейтингини эълон қилди.

Рейтингда биринчи ўринни 23 ёшли Жимми Доналдсон (MrBeast номи билан танилган) эгаллади – унинг даромади 2021 йилда 54 млн долларни ташкил этган. Йил натижаларига кўра, Доналдсоннинг роликлари 10 млрд мартадан ортиқ кўрилган.

Иккинчи ўринга актёр, боксчи ва блогер Жейк Пол жойлашди – унинг даромади 45 млн долларга тенг бўлган.

Учинчи ўриндан жой эгаллаган геймер Markiplier эса ўтган йили 38 млн доллар ишлаган.

Evergrande’нинг биринчи электромобили

Хитойнинг Evergrande компанияси ўзининг биринчи электромобили Hengchi 5’ни тақдим қилди. Электромобилни ишлаб чиқариш белгиланган муддатдан 12 кун олдин якунланган.

Аввалроқ, бир неча моделлардаги электромобиллар тақдим этилган бўлса-да, ҳозирча фақат Hengchi 5’ни ишлаб чиқариш бошланган. Электромобиль бир қувватланишда тахминан 700 километр масофага ҳаракатлана олади, нархи эса 31,4 минг долларни ташкил этади.

Киберҳужумга учраган Украина ҳукумати

Украина Ташқи ишлар вазирлиги ва бошқа бир қатор давлат идоралари веб-сайтлари киберҳужумга учради.

«Украинлар! Сизнинг барча шахсий маълумотларингиз умумий тармоққа юкланди. Компьютердаги барча маълумотлар йўқ қилинди, уларни қайта тиклашнинг иложи йўқ. Қўрқинг ва бунданда ёмонини кутинг», дейилади Украина ТИВ расмий сайтида пайдо бўлган украин, рус ва поляк тилларидаги огоҳлантириш хабарида.

Украина Хавфсизлик хизмати дастлабки далилларга эга, киберҳужум ортида Россия махфий хизмати билан боғлиқ бўлган хакерлик гуруҳлари турган бўлиши мумкин.

Инсонга кўчириб ўтказилган ҳайвон юраги

Америкалик шифокорлар биринчи марта 57 ёшли Девид Беннетга генетик жиҳатдан ўзгартирилган чўчқанинг юрагини муваффақиятли трансплантация қилди.

Операция саккиз соат давом этган. Шифокорларнинг айтишича, беморнинг аҳволи яхши. 

Трансплантация қилинган орган регенератив тиббиёт соҳасидаги ишланмаларга ихтисослашган Американинг Revivicor компанияси томонидан тақдим этилган.

Донор ҳайвонда ўтказилган генетик модификацияларга трансплантациядан кейин юракнинг кенгайишига йўл қўймайдиган ўсиш генини блоклаш, шунингдек, унинг бемор организмида яхшироқ илдиз отиши учун чўчқа геномига бир неча инсон генларини қўшиш кабилар киради.