Қашқадарёда жазо тайинланган судланувчиларнинг 28 фоизи озодликдан маҳрум этилгани маълум қилинди

Қашқадарё вилоятида жазо тайинланган судланувчиларнинг 28 фоизи озодликдан маҳрум этилган. Бу ҳақда вилоят суди раисининг ўринбосари Ў.Мамадалиев хабар бермоқда.

Маълум қилинишича, 2021 йил давомида Қашқадарё вилоятидаги жиноят ишлари бўйича судларида 3 780 нафар шахсга нисбатан 2 798 та жиноят иши кўриб чиқилган. Улардан 593 та жиноят иши ҳаракатдан тугатилиб, 695 нафар шахс жиноий жавобгарликдан озод қилинган.

2 861 нафар шахсга нисбатан 2 072 та жиноят иши бўйича жазо тайинланиб, айблов ҳукми чиқарилган. Шундан 806 нафар судланувчига ёки уларнинг 28 фоизига озодликдан маҳрум қилиш жазоси тайинланган.

60 нафар шахс шартли ҳукм қилинган, 2 055 нафар судланувчига ёки уларнинг 72 фоизига озодликдан маҳрум қилиш билан боғлиқ бўлмаган жазолари тайинланган.

Қайд этилишича, судланганларнинг 632 нафарини муқаддам судланган шахслар ташкил қилган.