Назарбоев Тўқаевнинг «Нур Отан» партияси етакчиси этиб сайлангани ҳақида гапирди 

Элбоши матбуот хизмати хабарига кўра, жорий қурултойнинг тарихий аҳамиятини таъкидлаган Нурсултон Назарбоев унинг партиядошлари Қосим-Жўмарт Тўқаевни «Нур Отан» партияси раислигига сайлаш таклифини қўллаб-қувватлашига ишонч билдирди. 

«Охирги бир ярим йил ичида партия жиддий тизимли қайта юкланишни бошидан кечирди. Мен партия устидан тўлиқ назорат амалдаги давлат раҳбари Қосим-Жўмарт Кемелевич Тўқаевга ўтказилишини бу жараённинг сўнгги босқичи деб биламан. Партияга Президент сайловида номзоди кўрсатилган ва уни қўллаб-қувватлаган шахс раҳбарлик қилиши керак. Бугун Қозоғистон президенти раҳнамолигида энг муҳим ижтимоий-иқтисодий ва сиёсий ислоҳотлар комплекси амалга оширилмоқда. «Нур Отан» партияси барча зарур ресурсларга эга бўлган ҳолда, уларни амалга оширишда ишончли ёрдамчига айланиши керак», деди Назарбоев. 

Элбошининг таъкидлашича, жамоатчиликнинг кенг қўллаб-қувватлаши билангина Қозоғистон мустақиллигини мустаҳкамлашга қаратилган кенг кўламли ислоҳотларнинг муҳим натижаларига эришилади. 

Аввалроқ Қозоғистон парламенти Назарбоевни Хавфсизлик кенгашига умрбод раислик қилиш ҳуқуқидан маҳрум этгани хабар қилинганди. 

Бундан ташқари, Нурсултон Назарбоевнинг тўнғич қизи Қозоғистондаги ҳукмрон «Нур Отан» партияси сиёсий кенгашидан чиқариб юборилди.