Экоқўмита Асакадаги дарахтлар кесилиши бўйича муносабат билдирди

Андижон вилоят Экология ва атроф-муҳитни муҳофаза қилиш бошқармаси томонидан Асака туманида 10 га яқин кўп йиллик дарахт кесиб юборилгани ҳақидаги хабар юзасидан муносабат билдирди.

Қўмита инспектори дастлабки суриштирув ишларини олиб борган.  

“Асака тумани “Амир Темур” МФЙ ҳудудидаги дарахтларни кесишга қонунчиликда белгиланган тартибда экология органи хулосаси ва маҳаллий давлат ҳокимиятининг рухсатномаси берилмаган. Ҳудуддаги дарахтларни кесишга рухсатнома олиш учун хусусий корхона раҳбарияти томонидан Давлат хизматлари марказига мурожаат қилинмаган”, дейилади муносабатда.

Бошқарма ҳолат юзасидан суриштирув ишлари давом этаётгани ва ушбу қонунбузарлик ҳолати натижалари бўйича қўшимча ахборот бериб борилишини маълум қилди.

Kun.uz маълумотига кўра, Асака туманида жойлашган «Тўрахон ота» чойхонаси ўрнидаги қурилиш ишлари вақтида 3–4 кун муқаддам мазкур ҳудуддаги ўнга яқин дарахтлар кесилган. Дарахтлар орасида, каштан, арча ва элдор қарағайлари ҳам бўлган.