Фермер хўжалиги ерини ўзбошимчалик билан эгаллаб, сотишга уринганлар ушланди

Асака туманида тезкор тадбир давомида фермер хўжалигига қарашли ер майдонини ўзбошимчалик билан эгаллаб олиб, уни пулга сотишга уринган икки фуқаро ашёвий далиллар билан ушланди.

Фото: Бош прокуратура ҳузуридаги департамент

Бош прокуратура ҳузуридаги Департаментнинг Асака тумани бўлими ва бошқа ҳуқуқни муҳофаза қилувчи органлар ҳамкорлигида ўтказилган тезкор тадбирда фуқаролар В.Т. ва Х.С. тумандаги “Ю.М.” фермер хўжалигининг “Юқори Бўз” МФЙ ҳудудидаги 0,6 гектар ер майдонини ўзбошимчалик билан эгаллаб олгани маълум бўлди.

Аниқланишича, улар ушбу ер майдонини фуқаро У.К.га 25 000 АҚШ долларига сотишга келишиб, кадастр ҳужжатларини кейинчалик расмийлаштириб беришини ваъда қилган. Тезкор тадбир вақтида улар 22 500 АҚШ долларини олган пайтда ашёвий далиллар билан қўлга олинган.

Мазкур ҳолат юзасидан Жиноят кодексининг 168-моддаси (фирибгарлик) ва 229-моддаси (ўзбошимчалик) билан жиноят иши қўзғатилиб, ҳозирда тергов ҳаракатлари олиб борилмоқда.