"Лавров Украина ҳақида гапираётгандек туюлди". Британия ташқи ишлар вазири Ростов ва Воронеж тўғрисидаги сўзларига изоҳ беришга мажбур бўлди

Буюк Британия ташқи ишлар вазири Лиз Трасс Москвада Россия ташқи ишлар вазири Сергей Лавров билан учрашув чоғида адашиб гапиргани учун изоҳ беришига тўғри келди. Россия ОАВнинг ёзишича, Трасс Воронеж ва Ростов областларини Украинага тегишли деб ҳисоблаб хатога йўл қўйган.

Пайшанба куни Британия Форин-офиси раҳбари Украина билан чегарадаги вазиятни Лавров билан муҳокама қилиш учун Москвага келди. 

ТАСС агентлиги ва "Коммерсант" газетаси манбаларининг айтишларича, Трасс Лавров билан суҳбат чоғида россиялик ҳарбийларни Украина чегарасидан олиб кетиш зарурлигини айтган. Лавров Россия аскарлари ўз ҳудудларида эканлигини айтиб жавоб қайтарган.

Таъкидланишича, шундан сўнг россиялик вазир: "Ахир Россиянинг Ростов ва Воронеж областлари устидан суверенитетини тан оласизми?" деб сўраган. "Буюк Британия Россиянинг бу областлар устидан суверенитетини ҳеч қачон тан олмайди", - дея Форин-офис раҳбарининг сўзларидан иқтибос келтирган Россия ОАВ.

"Коммерсант"нинг маълумот беришича, шунда Буюк Британиянинг Москвадаги элчиси Дебора Броннерт вазирга гап айнан Россия областлари ҳақида бораётганини англатган.

Бу хабар интернетда тарқалганидан кўп ўтмай, Британиянинг Москвадаги элчихонаси ижтимоий тармоқлардаги саҳифаларида Россия ОАВдаги хабарлар на тасдиқланган, на рад этилган изоҳни жойлаштирди.

"[Буюк Британия ташқи ишлар] вазири [РБК] нашрига берган интервьюсида: "Вазир Лавров Украинанинг бир қисми ҳақида гапираётгандек туюлди. Мен бу областлар [Ростов ва Воронеж] суверен Россиянинг бир қисми эканлигини қайд этдим", - дейилади дипломатик ваколатхонанинг "Твиттер"даги саҳифасида.

"Кар билан соқовнинг суҳбати"

Сергей Лавров Лиз Трасс билан суҳбатни беқиёс деб атади, аммо британиялик ҳамкасби билан суҳбатда ҳеч қандай янги гап эшитмаганини қайд этди.

Унинг сўзларига кўра, ёпиқ эшиклар ортида икки соат давом этган мулоқот чоғида Британия Россия қўшинларини ўзининг ҳудудидан олиб чиқиб кетиши кераклигини қайта-қайта талаб қилган ва унинг жавобларини тингламаган.

“Ростини айтсам, кар билан соқов суҳбатлашгандек бўлгани ҳафсаламни пир қилди. Гўёки қулоқ солаётгандекмиз, лекин ҳеч нарсани эшитмаяпмиз”, — деди Лавров.

"Суҳбатимиз вақтида аниқ соқов эмасдим, - дея эътироз билдирди Трасс. – Мен Буюк Британиянинг вазият бўйича тутган позициясини аниқ билдирдим. Россиянинг Украинадаги ҳаракатларининг олдини олиш учун барча имкониятларни ишга соламиз".

Буюк Британия Украинанинг Россияга қарши туриши учун энг катта ёрдам бераётган мамлакатлар сирасига киради. Лондон Киевга танкка қарши ракета мажмуаларини жўнатмоқда ҳамда Украинага қарши тажовуз давом этган тақдирда Россияга қарши кескин иқтисодий санкциялар киритилиши билан таҳдид қилмоқда.

Мавзуга оид: