Россия президенти беш соатдан ортиқ давом этган музокаралар чоғида асосан тарих ва НАТОнинг «хиёнати» ҳақида гапирган.
Владимир Путин Франция президенти Эммануэл Макрон билан учрашувнинг асосий вақтини Россиянинг Ғарбга нисбатан эътирозларини гапириш билан ўтказди, деб ёзади Reuters ўз манбаларига таяниб.
«Путин унга беш соатлик тарихий ревизионизмни тақдим этди», — деган Reuters суҳбатдошларидан бири.
Владимир Путин ва Эммануэл Макрон учрашуви юзма-юз, биргина таржимон гувоҳлигида бўлиб ўтганди.
Иккинчи суҳбатдошнинг сўзларига кўра, Макрон музокаралардан сўнг атрофидагиларга Путин 2019 йилдаги учрашувдагига нисбатан «кескинроқ ва тарихни кўп гапирадиган» бўлиб қолгандек туюлганини айтган.
Reuters суҳбатдошларининг айтишича, Путин учрашув давомида Макронга Ғарб НАТОни собиқ иттифоқ давлатлари ҳисобига кенгайтиришни бошлаб, Россия олдидаги мажбуриятларини бузганини таъкидлаган.
Путин суҳбат давомида 1997 йилдаги воқеалар - Польша, Венгрия ва Чехия альянсга кириш учун таклиф олганини бир неча марта гапирган. У Ғарб ваъдасини бузиб, хиёнат қилганини билдирган.
Шунингдек, Владимир Путин Украина тарихига тўхталган. У 2014 йилдаги воқеаларни давлат тўнтариши деб атаган. Владимир Зеленскийни эса «АҚШ томонидан назорат қилинади» деган, деб ёзади агентлик.
Макрон ва Путин ўртасидаги музокаралар 7 феврал куни Москвада бўлиб ўтди. Музокаралар беш соатдан ортиқ давом этди.
