Дамашқда портлашлар рўй берди

Портлашлар Макрон тўхтаган меҳмонхона яқинида содир этилган.

Фото: Видеодан кадр

7 июл куни тонгда Сурия пойтахти Дамашқда икки бор портлаш рўй берди.

Ҳодиса Four Seasons меҳмонхонаси яқинида содир этилган – айни вақтда Сурияга ташриф билан келган Франция президенти Эммануэл Макрон айнан шу ерда тунаганди. AFP агентлигининг хавфсизлик хизматларидаги манбаси айтишича, бомбалардан бири чиқинди қутисига, иккинчиси – меҳмонхона ёнида қолдирилган автомобилга жойлаштирилганди.

Портлаш оқибатида тўрт киши ҳалок бўлиб, 18 киши яраланган.

«Ал Арабия» телеканали мухбирига кўра, Макроннинг кортежи меҳмонхонани портлашдан бироз олдинроқ тарк этиб бўлганди. Елисей саройидагилар маълум қилишича, президент кортежидан портлаш овозлари эшитилмаган.

Ҳозирда Макрон президент саройида бўлиб турибди, у ерда Франция ва Сурия раҳбарлари ўртасидаги учрашув бўлиб ўтмоқда.

Reuters агентлиги қайд этишича, Макрон 2024 йил декабрида Башар Асад ҳокимиятдан ағдарилганидан кейинги даврда Сурияга келган илк Европа Иттифоқига аъзо давлат раҳбари бўлди. Бундан ташқари, у Франциянинг 2009 йилдан буён Сурияга ташриф буюрган илк президенти бўлди.

Тайёрлаган Азиз Қаршиев

#Дамашқ #Эммануэл Макрон

Сурияда қуролли мухолифатнинг 2024 йил 27 ноябридан бошланган кенг кўламли ҳарбий ҳаракатлари орадан 12 кун ўтиб, 8 декабрда Дамашқнинг қулашига олиб келди. Мамлакатда Асадлар сулоласининг 53 йиллик ҳукмронлиги якун топди.