“Ўзбекнефтгаз”: “Учқир” сиқув компрессор станциясидаги таъмирлаш ишларига Германия ва Сингапур компаниялари мутахассислари жалб этилди

Газли нефть ва газ қазиб чиқариш бошқармасига қарашли “Учқир” сиқув компрессор станциясида аниқланган камчиликларни бартараф этиш ва авариявий тўхталишларнинг олдини олиш мақсадида таъмирлаш ишларига Германиянинг “Siemens Energy”, Сингапурнинг “Enter Engineering РТЕ. LTD” компаниялари ва акциядорлик жамиятининг бир гуруҳ малакали мутахассислари жалб этилди.

Ушбу сиқув компрессор станциясининг асосий вазифаси “Дояхотин”, “Қумли” гуруҳлари ва “Учқир” конлардаги табиий газларнинг тез ва самарали қазиб олинишидан иборат. Шуни алоҳида таъкидлаб ўтиш жоизки, битта газ ҳайдаш агрегатининг тўхтаб қолиши кунлик 1 миллион куб метрга яқин табиий газ қазиб олиш ҳажмининг қисқаришига олиб келади.

Юқоридагиларни ҳисобга олган ҳолда ҳамда станция кафолат муддатида турганлиги сабабли, аниқланган носозликларни бартараф этиш мақсадида таъмирлаш ишларини тезкор равишда ўтказиш зарурияти пайдо бўлди. Ушбу ишларни амалга ошириш учун “Siemens Energy” компанияси мутахассислари билан биргаликда станциянинг 200-сонли газ ҳайдаш агрегатига ўрнатилган “SGT-400” русумли газ турбинали двигателида таъмирлаш ишлари ишлаб чиқарувчи заводнинг йўриқномасига асосан амалга оширилмоқда.

Таъмирлаш жараёнида газ турбинали двигатель демонтаж қилиниб, “Siemens Energy” компанияси томонидан етказиб берилган таянч подшипникини янгисига алмаштириш ишлари амалга оширилади.

Шунингдек, бир қанча техник жиҳатдан мураккаб бўлган ҳисоблашлар ҳам ўтказилади. Созлаш ишлари ҳамда газ ҳайдаш агрегатининг автоматика қисмида “Махсусэнергогаз” АЖ мутахассислари ҳамкорлигида автоматик бошқарув тизими, датчик ва приборлари текширилиб, профилактика ишлари олиб борилди. Натижада 200-сонли газ ҳайдаш агрегатининг узлуксиз, бир меъёрда ишлашининг таъминланишига ҳамда табиий газ қазиб олиш ҳажми қисқаришининг олдини олишга эришилди.

Маълумот учун: “Учқир” сиқув компрессор станцияси Бухоро вилояти Ромитон туманида жойлашган бўлиб, 2 та газ ҳайдаш агрегатлари мавжуд ва йилига 5,0 млрд куб метр табиий газни ҳайдаб бериш қувватига эга. Станцияга 2021 йилда Германиянинг “Siemens Energy” компаниясида ишлаб чиқарилган газ ҳайдаш агрегатлари ўрнатилган ва ишга туширилган.

“Ўзбекнефтгаз” АЖ Матбуот хизмати Ⓣ