Россия баллистик ракеталар билан ҳарбий машғулотлар ўтказишни бошлади. Машғулотларни Путин ва Лукашенко биргаликда кузатади

Лукашенко Россия билан ҳамкорликда ўтказилаётган “Иттифоқ қатъияти – 2022” машғулотлари фонида Москвага келган.

Фото: Pool photo by Sergei Chirikov

Россия президенти Владимир Путин стратегик мудофаа кучлари машғулотларига старт берди. Машғулотлар доирасида баллистик ва қанотли ракеталар учирилади.

Машғулотларда ҳаво-космик кучлар, жанубий ҳарбий округ, стратегик аҳамиятга эга ракета қўшинлари, Шимолий ва Қора денгиз флотлари иштирок этади.

Аввалроқ РБК машғулотлар шахсан мамлакат президенти Владимир Путин раҳбарлиги остида ўтказилиши ҳақида хабар берганди.

Путин баллистик ракеталар парвозини Беларусь президенти Александр Лукашенко билан биргаликда кузатиб боради.

Лукашенко тадбирда Путиннинг таклифи билан иштирок этади. У Россия билан ҳамкорликда ўтказилаётган “Иттифоқ қатъияти – 2022” машғулотлари фонида Москвага келган.