24 февраль куни «Мирзо Улуғбек» бекатида номаълум шахс поезд тагига ўзини ташлагани сабабли Тошкент метросининг «Чилонзор» йўналишида поездлар қатнови тахминан бир соат давомида тўхтаб қолган. Бу ҳақда воқеа гувоҳлари Kun.uz’га хабар беришди.
Метрополитен матбуот хизматининг хабар беришича, воқеа соат 21:00 да содир бўлган. Натижада «Чилонзор» йўлининг бир томонида поездлар ҳаракати вақтинча тўхтатиб қўйилган.
«Ҳолат юзасидан батафсил маълумотни дастлабки суриштирув ишлари якунига етгач маълум қиламиз», дейилади расмий хабарда.
Тошкент метрополитенининг расмий Telegram-каналига соат 22:21да жойлаштирилган хабарда поездлар ҳаракати доимий режа асосида давом эттирилаётгани маълум қилинган. Бу маълумотни воқеа жойида бўлиб турган гувоҳлар ҳам тасдиқлашди.
Расмий хабарларда ўзини поезд тагига ташлаган эркакнинг аҳволи ҳақида ҳеч қандай маълумот берилмаган.
Эслатиб ўтамиз, 23 февраль куни «Абдулла Қодирий» метро бекатида поезд тўхтаб қолганди. Воқеа жойида бўлган Kun.uz мухбири вагонларда бўлган тахминан 200 нафар йўловчи бекатга туширилгани, ярим соатдан кейин бошқа поезд йўловчиларни олиб кетгани ҳақида хабар берганди. Расмий хабарларда ушбу ҳолат техник носозлик туфайли юз бергани айтилса-да, муаммонинг асл сабаби очиқланмаган.
