Сурхондарёда фуқаронинг ўқишини хориждан кўчириб беришини айтиб 1 300 доллар олган шахс ушланди

У фуқаронинг Тожикистондаги ўқишини Ўзбекистондаги ОТМга кўчириб, сўнг ишга жойлаб қўйишни ваъда қилган.

Фото: Иқтисодий жиноятларга қарши курашиш департаменти

Бош прокуратура ҳузуридаги департаментнинг хабар беришича, департаментнинг Сариосиё туман бўлими томонидан тезкор тадбир ўтказилган. Тадбирда фуқаро К.И. фуқаро Ш.нинг ишончига кириб, 1 500 АҚШ доллари эвазига Тожикистондаги ўқишини Ўзбекистондаги ОТМга кўчириб бериш ҳамда ишга жойлаштириб қўйишни айтиб, шундан 1 300 доллар олган вақтда ашёвий далиллар билан ушланган.

Қайд этилишича, мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.