Эрон Россия учун иқтисодий йўлак вазифасини бажариши мумкинлиги айтилди

Охирги 11 ойда Эрондан Россияга экспорт ҳажми 20, импорт ҳажми 52 фоизга ўсди. Бу ҳақда Эрон божхона бошқармаси вакили Руҳулла Латифийга таяниб “Онадўлу” агентлиги хабар берди.

Ўтган йили Росссияга экспорт ҳажми 447 млн 763 минг долларни ташкил этганди, деди Латифий.

«Сўнгги 11 ойда экспорт ҳажми 20 фоизга ўсиб, 539 млн 393 минг долларга етди, импорт ҳажми эса 52 фоизга ўсиб, 1 млрд 451 млн 206 минг долларни ташкил этди», - деди у.

Латифийнинг сўзларига кўра, Россия халқаро санкцияларга қарши курашда Эрон тажрибасидан фойдаланиши мумкин. 

Унинг билдиришича, Эрон Россия учун иқтисодий йўлак вазифасини бажаришни ўз зиммасига олиши мумкин.

Nournews сайтининг хабарига кўра, ўтган ҳафтада Эрон Россиядан 20 миллион тонна қишлоқ хўжалик маҳсулотларини импорт қилиш бўйича шартнома имзолаган.