Германияда коронавирусга қарши қарийб 90 марта эмланган эркакка қарши иш очилди

У март ойи бошларида Айленбург шаҳридаги вакцинация марказида ушланган.

Фото: Picture Alliance/DPA

Магдебург шаҳрида яшовчи 60 ёшли эркак 2021 йилдан буён турли вакцинация марказларида SARS-CoV-2 коронавирусига қарши қарийб 90 марта эмлангани маълум бўлди.

Унга нисбатан ҳужжатларни сохталаштириш ва ноқонуний равишда эмланганлик тўғрисидаги сертификатларни бериш бўйича иш очилди.

Хабар қилинишича, у Дрездендаги вакцинация марказларидан бирининг эътиборини тортган. Германия Қизил хоч жамияти ходимлари бошқа вакцинация марказларини ғайриоддий ташриф буюрувчи ҳақида хабардор қилган ва улардан ушбу эркак келган тақдирда полиция билан боғланишни сўраган. У шу йилнинг март ойи бошларида Айленбург шаҳридаги вакцинация марказида ушланган.

Полициянинг маълумотига кўра, эркак ҳар сафар ўзининг ҳақиқий исми ва манзилини кўрсатиб эмланган. Маълумотлар базасида аниқланишича, у 87 марта турли вакциналар билан эмланган.

Эркакнинг уйидан кўплаб бўш вакцинация паспортлари топилган. У паспортларга бошқа одамларнинг исмларини ёзганлиги тахмин қилинмоқда. Бунда вакцина партиясининг рақами ҳақиқий бўлган.