Швейцария Россиянинг 8 млрд долларлик активларини музлатди

Россиянинг Швейцариядаги активлари 150–200 млрд швейцар франкини ташкил этади.

Швейцария Россиянинг 7,5 млрд швейцар франкига (8 млрд доллар) тенг миқдордаги активларини музлатди. Бу ҳақда Швейцария иқтисодий масалалар бўйича давлат котибияти вакили Эрвин Боллинжерга таяниб Bloomberg хабар берди.

Март охирларида Швейцарияда Россиянинг 5,75 млрд франклик активлари музлатилгани хабар қилинганди. Улар банк ҳисобрақамлари, кўчмас мулк ва санъат асарларини ўз ичига олади.

Шу билан бирга, SECO активлар мусодара қилинмагани, балки эгаларида қолишини билдирган.

Боллинжернинг сўзларига кўра, Россиянинг Швейцариядаги активлари 150–200 млрд швейцар франкини ташкил этади. Унинг айтишича, 900 нафарга яқин россиялик санкциялар рўйхатига киритилган, аммо «уларнинг озчилиги» Швейцарияда кўчмас мулкка эга.