Ҳаракатланиш эркинлиги чекланган шахсларни ҳисобга олиш бўйича реестр шакллантирилади

Вазирлар Маҳкамасининг “Ҳаракатланиш эркинлиги чекланган шахсларни ҳисобга олиш бўйича ягона электрон реестрни шакллантириш орқали жамоатчилик назоратини кучайтириш тўғрисидаги низомни тасдиқлаш ҳақида”ги қарори лойиҳаси эълон қилинди.

Ҳаракатланиш эркинлиги чекланган шахсларни ҳисобга олиш бўйича ягона электрон реестрни шакллантириш орқали жамоатчилик назоратини кучайтириш тўғрисидаги низом тасдиқланади.

Белгиланишича:

• ҳаракатланиш эркинлиги чекланган шахсларни ҳисобга олиш бўйича ягона электрон реестрни юритиш ва ушланган шахсларни ягона реестрга киритиш тизими такомиллаштирилади;
• суд, ҳуқуқни муҳофаза қилувчи органлар ҳамда омбудсманга ягона электрон реестрдаги маълумотлар билан танишиш имконияти яратилади.

Ички ишлар вазирлиги Ахборот технологиялари ва коммуникацияларни ривожлантириш вазирлиги билан биргаликда:

а) ишлаб чиқилиши режалаштирилган электрон реестрни юритиш дастурининг техник топшириғи белгиланган тартибда ахборот хавфсизлиги талабларига мослигини экспертизадан ўтказади;

б) унинг техник топшириғи асосида ишлаб чиқилган электрон реестр тизимини ишга туширишдан аввал сертификациядан ўтказади;

в) яратилган электрон реестр тизимини ахборот ва киберхавфсизлик талабларига мослик ҳолати юзасидан экспертизадан ўтказади;

г) ҳаракатланиш эркинлиги чекланган шахсларни ҳисобга олиш бўйича идоралараро ягона электрон реестр юритиш дастурини ишлаб чиқади;

д) Мудофаа вазирлиги ва Соғлиқни сақлаш вазирлиги ҳамкорлигида ягона электрон реестр ахборот тизимларини ўзаро интеграция қилиш чораларини кўради;

е) ҳаракатланиш эркинлиги чекланган шахслар сақланадиган жойларга жойлаштирилган шахслар тўғрисидаги маълумотлар алмашинувини “Электрон ҳукумат” тизими идоралараро интеграция платформаси орқали амалга оширилишини таъминлайди ҳамда электрон дастурни такомиллаштириш юзасидан тадбирларни амалга оширади;

ё) кўрсатилган хизматларни “Киберхавфсизлик маркази” давлат унитар корхонаси томонидан шартнома асосида амалга оширади.

Ҳаракатланиш эркинлиги чекланган шахсларни ҳисобга олиш бўйича ягона электрон реестрни юритишда унга техник хизмат кўрсатувчи ҳамда ахборот ва киберхавфсизликни таъминлаш бўйича ваколатли идора этиб Ички ишлар вазирлиги белгиланади.