Чилонзорда Кичик ҳалқа йўлида транспорт ҳаракатига чеклов жорий этилади

Тошкент шаҳрининг Чилонзор тумани ҳудудидан ўтувчи Кичик ҳалқа автомобил йўлининг бир қисмида қурилиш-монтаж ишлари сабабли транспорт воситалари ҳаракати вақтинча чекланади. Ҳайдовчиларга ҳаракат йўналишларини олдиндан режалаштириш тавсия этилди.

Фото: Тошкент шаҳар ЙҲТEМ

Маълум қилинишича, чекловлар 2026 йил 19 июн куни соат 23:00 дан 22 июн куни соат 06:00 гача амал қилади.

Бу даврда Кичик ҳалқа автомобил йўлининг Тошкент давлат педагогика университети олдидан Дилхуш 2-тор кўчаси кесишмасигача бўлган қисмида транспорт ҳаракати чекланади.

Мутасаддиларнинг билдиришича, қурилиш-монтаж ишлари давомида мазкур йўналиш бўйлаб ҳаракатланувчи автобуслар ҳамда бошқа транспорт воситалари учун айланма ҳаракат схемалари жорий этилади. Қатнов махсус белгиланган муқобил йўналишлар орқали ташкил қилинади.

Шу муносабат билан ҳайдовчилардан йўлда юзага келиши мумкин бўлган тирбандликлар ва ноқулайликларни ҳисобга олган ҳолда сафарларини олдиндан режалаштириш сўралмоқда.

Масъул идоралар вақтинчалик ноқулайликлар учун узр сўраб, барча ҳаракат иштирокчиларини йўл белгилари ва вақтинча ҳаракат схемаларига қатъий амал қилишга чақирди.