Одессага ҳужум, метродаги Зеленский ва эрининг жасадини излаётган аёл. Уруш суратлари

Урушнинг 59-кунида Одессага Россия ракеталари келиб тушди — саккиз киши ҳалок бўлган, улар орасида уч ойлик чақалоқ ҳам бор. Одамлар Украина шаҳарларидан эвакуация бўлиш йўлларини излашда давом этмоқда. Украина президенти Володимир Зеленский Киевдаги метро бекатида матбуот анжумани ўтказди.

Одессада Россия томони йўллаган зарба келиб тушган кўп қаватли уйдан омон чиққан оила аъзолари. Фото: Тимофей Мельников

Украинадаги уруш: сўнгги маълумотлар

Одессада турар жой кварталига ракета зарбаси келиб тушди. Россия шаҳар ҳудудига ракета йўллангани фактини тасдиқлаган, аммо Ғарб қуроллари сақланувчи логистик терминалга зарба йўлланганини айтган;
Украина президенти Володимир Зеленскийнинг маълум қилишича, Одесса ўққа тутилиши оқибатида камида саккиз киши ҳалок бўлган, жумладан уч ойлик бола ҳам;
Шанба куни Зеленский Киевдаги метро бекатларидан бирида матбуот анжумани ўтказди. У қандай ҳолатларда Украина Россия билан музокаралардан чиқишини маълум қилди: агар «Мариуполдаги одамларимиз ўлдирилса» ёки босиб олинган ҳудудларнинг бирортасида референдум эълон қилинса;
Шунингдек, Зеленский якшанба куни Киевга АҚШ давлат котиби Энтони Блинкен ва мудофаа вазири Ллойд Остин ташриф буюришини анонс қилди;
Мариуполдан тинч аҳолини эвакуация қилиш яна барбод бўлди. Украина ҳукумати бунга россиялик ҳарбийларнинг ҳаракатлари сабаб бўлганини билдирган. ДХР кучлари эса бунда «Азовстал» заводи ҳимоячиларини айблаган.
Луганск областида отишмалар давом этмоқда, Донецкда - туташув чизиғида фаол ҳарбий ҳаракатлар кечмоқда, Мариуполга - авиация зарбалари берилмоқда. Днепропетровск областида темирйўл инфратузилмаси ва саноат корхоналарига учта ракета зарбалари келиб тушди. Бир киши қурбон бўлгани айтилмоқда. Харков областида тун бўйи отишмалар давом этган, уч киши жабрланган. Херсон областида гуманитар ҳалокат ёқасида турган аҳоли пунктларини ўққа тутиш давом этмоқда.

Қуйида Украинада 23 апрел куни олинган асосий суратлар:

Одесса