Россия 15 июнга ўтар кечаси 70 та ракета ва 600 дан ортиқ дрон билан Киев, Харкив ва Днипро бўйлаб ҳужум уюштирди. Киев мэри Виталий Кличкога кўра, шаҳарда беш киши ҳалок бўлиб, 30 дан ортиқ киши жароҳат олган. Украина пойтахтининг деярли барча ҳудудларида, жумладан, марказда вайронгарчиликлар қайд этилган.
Ҳужум оқибатида Киев-Печерск лаврасида ёнғин чиққан – Успенский собори ёниб кетган. Черков хизматчилари лавра ҳудудидан иконалар ва ёдгорликларни олиб чиқиб, уларни ёнғиндан сақлаб қолишга ҳаракат қилишган. Бир неча соат ўтиб ёнғин ўчирилди, қимматбаҳо буюмлар сақлаб қолинди.
Лавра бош директори Максим Остапенконинг сўзларига кўра, Россия томонидан иккита мақсадли зарба берилган. Тунги соат 1:30 атрофида дронлардан бири собор марказига келиб урилган, шундан сўнг гумбаз ва юқори қаватларни қамраб олган ёнғин бошланган. Иккинчи зарба Иоанн Кушник минораси ва лавра қаршисида жойлашган «Мистецкий арсенал» музей мажмуаси биносига келиб урилган.
Украина православ черкови раҳбари Епифаний Киев бўйлаб зарбани «Россиянинг инсониятга, тарихга, христианликка қарши навбатдаги жинояти», Владимир Путинни эса «Кремл дажжоли» деб атади. Украина православ черкови вакили, Нежинский ва Прилуцкий митрополити Климент «бу шунчаки тарихий иншоот эмас, балки христианларнинг буюк зиёратгоҳи бўлгани»ни таъкидлаган. «Бу оқшом Успенский соборида қолган яралар аллақачон барча ахлоқий чегараларни босиб ўтган урушдан яраланган бутун Украина халқининг чуқур фожиасини акс эттиради», – деди Климент.
Лавра бўйлаб берилган зарбани Европа мамлакатлари етакчилари ва вазирлари – жумладан, Франция президенти Эммануэл Макрон қоралади. «Россиянинг Украинага қарши тўрт йилдан ортиқ давом этаётган тажовузкор уруши каби, жаҳон маданий меросига қилинган бу ҳужумни ҳам асло оқлаб бўлмайди», – дея ёзган у.
Valentyn Ogirenko / Reuters / Scanpix / LETA
Evgeniy Maloletka / AP / Scanpix / LETA
