Киев ва Днипрога зарба. Қурбонлар сони ошмоқда

Россия қўшини 2 июнга ўтар кечаси Украина бўйлаб баллистик ва қанотли ракеталар, шунингдек, дронлар билан ҳужум уюштирди. Украина қуролли кучлари ҳаво кучлари қўмондонлиги маълумотига кўра, Россия ҳарбийлари турли типдаги 656 та дрон (жумладан, имитатор дронлар) ва 73 ракета (шундан саккизтаси «Циркон» русумли гиперзтовушли қанотли ракеталар) қўллаган. «РБК-Украина» нашри қайд этишича, бу РФ қуролли кучлари илк бор бир ҳужумнинг ўзида бу қадар кўп «Циркон» ракеталарини ишга солиши бўлди. Украина томони ҳисоботига кўра, бундай ракеталарнинг бирортасини уриб туширишга муваффақ бўлинмаган.

Зарбанинг асосий йўналиши Киев эди. Шунингдек, ракета ва дронлар Днипро, Харкив, Запорижжя, Полтава областлари ҳамда бошқа регионларга учиб келган.

Киев шаҳри мэри Виталий Кличко хабар беришича, шаҳарда Россия зарбаси оқибатида олти киши ҳалок бўлган. Шаҳар ҳарбий маъмурияти раҳбари Тимур Ткаченко берган сўнгги маълумотларда, 81 киши яралангани айтилган. Шаҳарнинг турли районларида уйлар ва маъмурий бинолар, жумладан, бешта тиббий муассаса биноси шикастланган.

Днипрода икки қаватли ва тўрт қаватли турар жой бинолари вайрон бўлган. Днипропетровск области раҳбари Олександр Ганжанинг маълумотига кўра, 16 киши ҳалок бўлган. Қурбонларнинг уч нафари болалар (улардан бири, 3 ёшли боланинг жасади тўрт қаватли уй харобалари остидан топилган) ва бир нафари зарбадан кейин чақирув бўйича етиб келган ФВВ ходими. 42 киши яраланган, шундан 22 нафари шифохонага ётқизилган. Днипро шаҳри мэри Борис Филатовга кўра, жами 50 та бинога зарар етган, шундан еттитаси буткул вайрон бўлган.

Қутқарувчилар тўрт қаватли уй харобаларида қидирув ишларини давом эттирмоқда ва яна бир неча кишининг тақдири номаълумлигича қолмоқда.

«Руслар Харкивдаги энергетикага муҳим инфратузилмаларга зарба берди. Киев, Миколайив, Запорижжя, Полтава, Суми, Черниҳив ва Хмелницкая областлари ҳам зарба остида қолди», – деб ёзди Украина президенти Володимир Зеленский ўз телеграм-каналида.

«Россиядан кенг кўламли ҳужуми ва мутлақо очиқ баёнот: агар Украина баллистика ва бошқа ракета зарбаларидан ҳимояланмаса, бу зарбалар давом этади», – дея қайд этади Зеленский. Украина президенти ҳаво тревогаси сигналларини эътиборсиз қолдирмаётгани учун мамлакат аҳолисига алоҳида миннатдорчилик билдирди.

Зеленский 29 майдан буён украинларни Россия томонидан ёпирилма зарба бўлиши эҳтимоли ҳақида огоҳлантириб келади. У 1 июн куни кечқурун берган баёнотида ҳам ушбу огоҳлантиришини такрорлаганди: «Ёпирилма зарба бўлиши мумкин. Улар шунга тайёрланмоқда».

Россия мудофаа вазирлиги Украинага зарба беришда «мудофаа саноати корхоналари», шунингдек, Украина қуролли кучлари билан боғлиқ «ёқилғи, транспорт инфратузилмаси объектлари ва ҳарбий аэродромлар» нишонга олинганини маълум қилди. Зарба «Киев режимининг террорчилик ҳаракатларига жавобан» берилгани қайд этилган.

Аввалроқ Россия ҳукумати, жумладан, президент Владимир Путин аввалроқ Старобелскка қилинган ҳужумга жавобан Украинага ёпирилма зарбалар билан таҳдид қилганди. Украина қуролли кучлари 22 майга ўтар кечаси Луҳанск областининг Россия назоратида бўлган қисмида жойлашган ушбу шаҳарга дронлар орқали зарба бериб, маҳаллий коллеж биноларини вайрон қилганди. Бунинг оқибатида 21 киши (18 ёшдан 21 ёшгача бўлган талабалар) ҳалок бўлган. Россия ҳужумни «теракт» деб баҳолаган.

Россия Ташқи ишлар вазирлиги бунинг ортидан мамлакат қуролли кучлари Киевдаги мудофаа корхоналари, «қарор қабул қилиш марказлари» ва қўмондонлик пунктларига зарба беришини маълум қилганди. 24 майга ўтар кечаси Россия Киев шаҳри ва Киев областига кенг кўламли зарба йўллаган, бу ҳужумда «Орешник» ракетаси ҳам қўлланганди. Ўшанда икки киши ҳалок бўлиб, 80 дан ортиқ киши жароҳатланганди.

Киев

Днипро