Қозоғистонда Назарбоевнинг ваколат ва имтиёзлари тўғрисидаги қонунни бекор қилиш режалаштирилмоқда 

Қозоғистон Конституциясига киритиладиган тузатишларда биринчи президент тўғрисидаги қонуннинг амал қилишини тўхтатиш кўзда тутилган. Бу ҳақда парламент қуйи палатаси спикери Ерлан Кошанов маълум қилди.

Ушбу қонун билан республиканинг биринчи президенти Нурсултон Назарбоевга қатор ваколат ва имтиёзлар ажратилганди.

"Тузатишлар билан элбоши мақоми бекор қилинади. Конституцияда Назарбоев давлат асосчиси сифатида кўрсатилади. Ушбу норма қабул қилинганидан сўнг биринчи президент тўғрисидаги қонун ҳам ўз кучини йўқотади", - деди Кошанов. 

Ҳозирда Қозоғистонда ишчи гуруҳ мамлакат Конституциясига тузатишлар киритиш устида иш олиб бормоқда.

 Нурсултон Назарбоев президентлик ваколатларини 2019 йил мартда топширганди.

2022 йил январдаги тартибсизликлардан сўнг Қозоғистон парламенти Назарбоевни Хавфсизлик кенгашига умрбод раислик қилиш ҳуқуқидан маҳрум этганди.