Литва парламенти Россияни террорчи давлат деб эълон қилди 

Литва сейми (парламент) Россиянинг Украинага бостириб киришини геноцид, Россияни эса террорчи давлат деб тан олинган резолюцияни қабул қилди. 

Резолюция матнида таъкидланишича, «РФ қуролли кучлари ва унинг ёлланма аскарлари Украина ҳудудида, жумладан, Буча, Ирпен, Мариупол, Бородянка ва Гостомелда ҳарбий жиноятлар содир этмоқда». 

Сеймнинг барча аъзолари томонидан бир овоздан қабул қилинган ҳужжатда айтилишича, Россиянинг Украинадаги мақсади украин халқини йўқ қилишдан иборат. 

Литва парламенти Россия қуролли кучларининг Украинадаги ҳаракатларини «геноцид» деб атади.

Ҳужжатда таъкидланишича, «Россия Федерацияси терроризмни қўллаб-қувватлайдиган ва амалга оширадиган давлат ҳисобланади».

Литва парламенти барча айбдорларни жавобгарликка тортиш ҳамда Россиянинг Украинадаги ҳаракатларини тергов қилиш ва баҳо бериш учун махсус жиноий трибунал тузишга чақирган.