Ҳатто вилоят ҳокимининг имзосини сохталаштириб, ер сотишган – президент коррупция кўлами ҳақида тўхталди

Фарғона вилоят фаоллар йиғилишида сўзга чиққан давлат раҳбари ҳокимиятлар тизимида ер сотиш билан боғлиқ ниҳоятда жиддий жиноятлар қайд этилаётганини таъкидлади.

“Ҳокимликларда шундай бюрократлар, шундай порахўрлар борки, қонундан ҳам қўрқмайди, 20 йилга қамалишини билса ҳам пора олаверади. Ерни аукцион орқали сотиб анча жиловлаб олдик, лекин ҳали ҳам шундай жиноятлар учраб турибди.

Ҳатто Фарғона вилояти ҳокими Хайрулла Бозоровнинг имзосини сохталаштириб, ер сотиш ҳолати аниқланган. Хайрулла буни ҳатто тушида ҳам кўрмаган. Ҳар бир вилоятда шундайлар бор – ўзи кичкина бюрократ амалдор, аммо энг кўп жиноятни қилади.

Унутманглар, халқимиз ҳаммасини кўриб турибди. Бундай ҳолатларга қарши аёвсиз кураш давом этади”, – дея президент сўзларидан иқтибос келтирмоқда Kun.uz мухбири.